O‘qituvchilarning mukofot pulidan nega soliq ushlanadi? Vazirlik izoh berdi
Maktabgacha va maktab ta’limi vazirligi ijtimoiy tarmoqlarda tarqalgan xabarlarga munosabat bildirdi.
Ijtimoiy tarmoqlarda 1-oktabr — O‘qituvchi va murabbiylar kuni munosabati bilan umumta’lim muassasalari xodimlariga to‘langan mukofot pullaridan daromad solig‘i ushlanganiga oid xabarlar turli muhokamalarga sabab bo‘ldi.
Maktabgacha va maktab ta’limi vazirligi matbuot kotibi Dilfuza Sobirova mazkur holat yuzasidan rasmiy izoh berdi.
Qayd etilishicha, Vazirlar Mahkamasining 2019-yil 30-sentabrdagi 823-son qaroriga muvofiq, 1-oktabr — O‘qituvchi va murabbiylar kuni munosabati bilan umumta’lim muassasalari xodimlari Direktor jamg‘armasi mablag‘lari hisobidan mehnatga haq to‘lash eng kam miqdorining 75 foizigacha miqdorda mukofotlanishi mumkin.
Vazirlikning tushuntirishicha, Soliq kodeksining tegishli moddalariga ko‘ra, ushbu mukofot rag‘batlantirish xususiyatiga ega to‘lov hisoblanadi. Shu sababli u xodimning jami daromadlari tarkibiga kiritiladi va undan daromad solig‘i undiriladi.
Vazirlik alohida ta’kidlaganidek, Soliq kodeksida ayrim turdagi pul mukofotlari uchun boshqa tartib belgilangan.
Jumladan, O‘zbekiston Prezidenti yoki Vazirlar Mahkamasi qarori asosida bir yo‘la beriladigan pul mukofotlari jismoniy shaxsning jami daromadi tarkibiga kiritilmaydi. Shu sababli bunday to‘lovlardan daromad solig‘i ushlanmaydi.
Masalan, “Yil o‘qituvchisi” tanlovi g‘oliblariga Prezident yoki Hukumat qarori asosida to‘lanadigan bir martalik pul mukofotlari ushbu toifaga kiradi.
