Nomaʼlum shaxslar maktab o‘quvchilarini o‘g‘irlab ketishyaptimi?
IIV shu mazmundagi xabarlarga rasmiy munosabat bildirdi.
Ijtimoiy tarmoqlarda maktab o‘quvchilarini o‘g‘irlashmoqchi bo‘lishayotgani haqida asossiz xabarlar tarqalmoqda. O‘tkazilgan tekshiruv jarayonida aniqlanishicha, 1 fevral kuni Shayxontohur tumanida 113-sonli maktabning 11-sinf o‘quvchisi F.N. boshqaruvidagi avtomashinaga 132-sonli maktab o‘quvchilari G.B, S.N. lar yerdagi muz bo‘lagini tepgan. Shundan so‘ng 11-sinf o‘quvchilari muz bo‘lagini tepgan bolalarni ichki ishlarga olib boramiz deb ularni og‘zaki qo‘rqitishgan.
«O‘quvchilar boshqa bunday qilmasligini aytib uyiga ketishgan. Hozirgi vaqtda bolalar sog‘-salomat ota-onasi bag‘rida», — deyiladi IIV xabarida.
Bundan tashqari, avtomashinani boshqarish huquqi bo‘lmagan maktab o‘quvchilarining ota-onasi bilan birga huquqbuzarlikka yo‘l qo‘ymaslik yuzasidan profilaktik suhbat o‘tkazilgan.
