Xorijlik olimlar ilk bor buyraklarni sog‘lom holatga qaytarish usulini topishdi
Ushbu kashfiyot surunkali buyrak kasalliklarini davolashning mavjud usullarini qayta ko‘rib chiqishga undaydi.
Singapur milliy yurak markazi (NHCS) Dyuk tibbiyot maktabi olimlari va nemis mutaxassislari dunyoda birinchi marta buyrak hujayralarini tiklash mumkinligini ko‘rsatdi. Dastlabki tadqiqot natijalari Nature Communications jurnalida eʼlon qilindi.
Mualliflar o‘z tadqiqotida jigar, o‘pka va yurakda, shuningdek, o‘tkir va surunkali buyrak kasalliklarida chandiqlarni keltirib chiqaradigan interleykin-11 (IL-11) oqsiliga eʼtibor qaratdilar. Olimlar bu oqsil buyraklar shikastlanganda molekulyar jarayonlar zanjirini qo‘zg‘atib, yallig‘lanish, fibroz va organlar faoliyatining buzilishiga olib kelishini aniqladi.
Biroq bu jarayon IL-11 oqsiliga antitana kiritish orqali bloklanganda, buyrak kanalchalari hujayralarining ko‘payishi (proliferatsiya) va tiklanishi, shuningdek, yallig‘lanishning barham topishi yuz beradi, natijada, buyraklar yana sog‘lom holatga qaytadi.
Olimlarning fikricha, ularning kashfiyoti surunkali buyrak kasalliklarini davolashning mavjud usullarini qayta ko‘rib chiqishga majbur qiladi.
