O‘zbekistonlik qutqaruvchilar Turkiyadagi vayronalar ostidan jami 11 kishini qutqardi
Shuningdek, 33 nafar halok bo‘lganlar vayronalar ostidan chiqarilgan.
O‘zbekiston Favqulodda vaziyatlar vazirligi qutqaruvchilari Turkiyada ro‘y bergan talafotli zilzila oqibatida vayronalar ostida qolgan yana ikki nafar jabrlanganlarni qutqardi. Bu haqda vazirlik matbuot xizmati xabar berdi.
“Hatay viloyatida vayronalarni ajratish paytida qutqaruvchilarimiz yana ikki nafar jabrlanganni tiriklayin olib chiqishdi”, — deyiladi xabarda.
8 fevral soat 21:49 holatiga ko‘ra, qidiruv-qutqaruv operatsiyasi boshlanganidan buyon O‘zbekiston FVV qutqaruvchilari tomonidan jami 11 nafar jabrlangan va 33 nafar halok bo‘lganlar vayronalar ostidan chiqarilgan.
Maʼlumot uchun: Turkiyaga O‘zbekistondan 60 nafar FVV qutqaruvchilari va 3 ta maxsus avariya-qutqaruv texnikasi yuborilgan. Ular 7 fevral kuni jo‘nab ketgandi. 7 fevral 17:00 holatiga Turkiyadagi tabiiy ofat oqibatida 1 nafar O‘zbekiston fuqarosi halok bo‘lgan. So‘nggi maʼlumotlarga ko‘ra, Turkiyadagi zilzilalar oqibatida halok bo‘lganlar soni 12 391 kishiga yetgan. Jabrlanganlar soni qariyb 63 ming kishiga yetdi.
