Toshkentda “Men g‘olib” marafoni yakunlandi
Unda kimlar g‘olib bo‘lgani maʼlum qilindi.
Bugun, 19 fevral kuni Toshkent shahrida O‘zbekiston Respublikasi Qurolli kuchlari tashkil topganligining 31 yilligi va Vatan himoyachilari kuniga bag‘ishlab “Men g‘olib” vatanparvarlik yugurish musobaqasi o‘tkazildi.
Musobaqalarda, asosan, O‘zbekiston Respublikasi Qurolli kuchlari va kuch tuzilmalarining 12 ta jamoasidagi 300 nafarga yaqin xizmatchi, yuzlab havaskorlar ishtirok etdi. Mudofaa vazirligi, Milliy gvardiya, Ichki ishlar vazirligi, Favqulodda vaziyatlar vazirligi, Davlat Xavfsizlik xizmati, Davlat bojxona qo‘mitasi, Bosh prokuratura kabi jamoalar o‘rtasida kechgan bahslarda g‘olib va sovrindorlar yakkalik va jamoaviy tarzda aniqlandi.
Poytaxtning «Xalqlar do‘stligi» maydonidan start berilgan 10 kilometr masofada yugurish musobaqalarining umumiy holdagi g‘olib va sovrindorlarini belgilash uchun 50-60 daqiqadan ko‘proq vaqt ketdi.
Natijalarga ko‘ra, 1-o‘rinni Mudofaa vazirligi akademiyasi tinglovchisi Javohir Xoliqberdiyev, 2- va 3-o‘rinlarni Ichki ishlar vazirligi akademiyasi kursantlari Fayzulla Habibullayev va Shavkat Nuriddinov egalladi.
Jamoalar o‘rtasida faxrli 1-o‘rin Mudofaa vazirligiga tegishli bo‘ldi. 2- va 3-o‘rinlar Prezident huzuridagi xavfsizlik kengashi hamda Davlat xavfsizlik xizmati jamoasiga nasib etdi.
