O’zbekistondagi afg’onlar ish bilan ta’minlandi
Bu haqda BMTning Taraqqiyot dasturi xabar berdi.
Oʻzbekistonda vaqtincha boʻlib turgan 400 dan ortiq Afgʻoniston fuqarolari respublika janubidagi Surxondaryo viloyatini koʻkalamzorlashtirish loyihasiga jalb etildi, deb xabar qildi BMT Taraqqiyot dasturining Oʻzbekistondagi vakolatxonasi matbuot xizmati.
Xabarga koʻra, Oʻzbekiston Tabiiy resurslar vazirligi va BMT Taraqqiyot dasturi vakillari Oʻzbekiston va Afgʻoniston fuqarolari ishtirokida amalga oshirilayotgan oʻrmonlarni barpo etish boʻyicha qoʻshma loyiha natijalari bilan tanishish maqsadida Surxondaryo viloyatiga tashrif buyurdi.
“Loyiha Afgʻoniston bilan chegaradosh Surxondaryo viloyatida Oʻzbekistondagi afgʻon qochqinlari va mezbon jamoalarning himoyaga muhtoj qatlamini naqd pul va boshqa toʻlov mexanizmlaridan foydalangan holda oʻrmonlarni qayta tiklash ishlariga jalb etish orqali favqulodda insonparvarlik ehtiyojlarini qondirishga qaratilgan”, deyiladi BMT Taraqqiyot dasturi matbuoti xabarida.
Matbuot xizmati maʼlumotlariga koʻra, loyihaga 413 nafar afgʻonistonlik qochqin (113 nafar ayol va 300 nafar erkak) hamda 194 nafar mahalliy aholi jalb etilgan. 2,5 ming tup daraxt, 287 ming tup saksovul ko‘chati ekildi.
