Jo Bayden Shavkat Mirziyoyevni Navro‘z bilan tabrikladi
AQSH yetakchisi maktub orqali O‘zbekiston Prezidenti va xalqiga ezgu tilaklarini yo‘llagan.
Prezident Shavkat Mirziyoyev nomiga AQSH Prezidenti Jozef Baydendan Navro‘z bayrami munosabati bilan tabrik maktubi keldi.
“Hurmatli Prezident janoblari!
Amerika xalqi nomidan Sizga va O‘zbekiston xalqiga Navro‘z ayyomi munosabati bilan eng ezgu tilaklarimizni yo‘llamoqdaman.
O‘tgan yil davomida O‘zbekiston va Amerika Qo‘shma Shtatlari umumiy muammolarni hal qilish, xalqlarimiz xavfsizligi va farovonligini taʼminlash maqsadida birlashdi.
Ushbu uyg‘onish va yangilanish mavsumida Qo‘shma Shtatlar O‘zbekiston xalqiga sodiqligini yana bir bor tasdiqlaydi. Shu kunlarda yangi marralarni belgilab, mustahkam tinchlik va o‘zaro anglashuv ruhidagi umumiy kelajak sari saʼy-harakatlarimizni davom ettirar ekanmiz, men mamlakatlarimiz o‘rtasidagi strategik sheriklik va xalqlarimiz do‘stligi yana-da mustahkamlanishiga ishonaman”, — deyiladi tabrikda.
