Shavkat Mirziyoyev Xitoy TIV rahbari bilan uchrashdi
Uchrashuvda Afg‘onistondagi vaziyatni tinch yo‘l bilan hal etish masalalariga eʼtibor qaratilgan.
Bugun, 12 aprel kuni Prezident Shavkat MIrziyoyev Afg‘onistonga qo‘shni mamlakatlar tashqi siyosiy idoralari rahbarlarining navbatdagi uchrashuvida ishtirok etish uchun O‘zbekistonga kelgan Xitoy Xalq Respublikasi Davlat kengashi aʼzosi, tashqi ishlar vaziri Sin Ganni qabul qildi.
O‘zbekiston-Xitoy har tomonlama strategik sheriklik munosabatlarini yana-da mustahkamlash va ko‘p qirrali hamkorlikni kengaytirishning dolzarb masalalari ko‘rib chiqildi.
Dastlab tashqi ishlar vaziri Sin Gan davlat rahbariga XXR Raisi Si Szinpinning salomi va eng ezgu tilaklarini yetkazdi.
Uchrashuv davomida siyosiy iroda va birgalikdagi saʼy-harakatlar tufayli ikki tomonlama munosabatlar misli ko‘rilmagan yuksak darajaga ko‘tarilgani alohida mamnuniyat bilan qayd etildi.
Keyingi yillarda tovar ayirboshlash ikki barobar, qo‘shma korxona va loyihalar soni uch barobar ko‘paydi, Xitoydan 11 mlrd dollarlik investitsiyalar jalb qilindi. Pandemiyadan so‘ng muntazam aviaqatnovlar tiklangach, hududlararo aloqalar, taʼlim va madaniy-gumanitar almashinuvlar faollashdi.
O‘zbekiston yetakchisi Xitoyga bo‘lajak davlat tashrifi va “Markaziy Osiyo - XXR” sammitiga puxta tayyorgarlik ko‘rish muhimligini taʼkidladi.
Xalqaro va mintaqaviy kun tartibidagi masalalar yuzasidan ham fikr almashildi.
Bugungi kunda texnik hujjatlari tayyorlanayotgan “O‘zbekiston – Qirg‘iziston - Xitoy” temiryo‘lini qurish loyihasini tez fursatda amalga oshirish ahamiyati qayd etildi.
Afg‘onistondagi vaziyatni tinch yo‘l bilan hal etish va ushbu mamlakatning ijtimoiy-iqtisodiy tiklanishiga amaliy ko‘maklashish borasidagi yaqindan muvofiqlashuvni davom ettirish zarurligiga alohida eʼtibor qaratildi.
