Go‘zallik qurbonlik talab qiladi!
Ayrim muolajalarni qilishdan oldin ularning minuslarini ham bilib oling.
Go‘zallik sanoati hech qachon bir joyda qotib turmaydi. Ayrim yangiliklar tez fursatda ommalashib ketadi. Ammo bir qarashda zararsiz bo‘lgan amaliyotlar ham o‘z nyuanslariga ega. Biror go‘zallik amaliyotiga borishdan oldin ular bilan tanishib chiqqan maʼqul.
Vinirlar
Ijtimoiy tarmoqlardagi rasmlarga qarasangiz, Gollivud tabassumi ko‘zingizni qamashtiradi. Hozir urf bo‘lgan Vinirlar tishlar bilan bog‘liq qator muammolarni hal qiladi.
Ammo ularni o‘rnatish uchun tish emali yarim millimetr arralanadi. Vinir esa stomatologik sement yordamida yopishtiriladi.
Vinirlar yorilishi yoki ko‘chib tushishi mumkin. Ularning yaroqlilik muddati 15 yil. Bu davr orasida vinirlar dastlabki ko‘rinishini yo‘qotishi mumkin.
Tishlarni oqartirish
Tishlarni oqartirganda ularning taʼsirchanligi ortib ketishi yoki milklarga shikast yetishi mumkin. Jarayondan oldin esa tish toshlarini tozalashga to‘g‘ri keladi. Plomba va protez tishlar esa oqarmaydi.
Bu muolaja natijasi bir yil saqlanishi mumkin. Siz bu vaqt oralig‘ida kofe, choy va boshqa rangli ichimliklar icha olmaysiz. Aks holda sarflagan pulingiz havoga uchadi.
Lazer epilyatsiyasi
Lazer epilyatsiyasi yoqimsiz tuklardan xalos bo‘lishning eng samarali usullaridan biridir. Ammo buning ham o‘z minuslari bor.
Avvalo barcha tipdagi sochlar ham lazer epilyatsiyasiga to‘g‘ri kelmaydi. Bundan tashqari, amaliyot barcha bosqichlar tugagach ham talab qilinishi mumkin.
Ayrim hollarda esa lazer aksincha tuklarni ko‘paytirib yuborishi ham mumkin.
Kiprik ektirish
Kiprik ektirish juda ommalashgan muolajadir. Ayni paytda ko‘chada sunʼiy kiprik ektirmaganlarni topish qiyinlashib qoldi. Bu jarayon nigohlarni o‘tkirlashtirsada, ko‘zlarga zarar yetkazishi, allergiya chaqirishi mumkin.
Bundan tashqari, yopishtirilgan kipriklar tabiiy kipriklarga zarar yetkazishi ham mumkin. Natijada tabiiy kipriklaringiz zaiflashib, siyraklashib qoladi.
Qosh mikrobleydingi
Qosh mikrobleydingi haqiqiyga o‘xshash qosh chizish imkonini beradi. Ammo og‘riq va noqulaylik tug‘dirishi ham mumkin. Jarayon noto‘g‘ri bajarilgan bo‘lsa, qoshlar notabiiy ko‘rinadi, noto‘g‘ri o‘sish va deformatsiya xavfi ham paydo bo‘ladi.
Lablarni kattalashtirish
Gialuron kislotasi yordamida lablarni shishirish kosmetik muolaja bo‘lib, u ayrimlar uchun o‘ta og‘riqli o‘tishi mumkin. Bundan tashqari, kislota taʼsiri 6-12 oydan so‘ng keta boshlaydi. Preparat noto‘g‘ri kiritilishi yoki anatomik o‘ziga xosliklar tufayli kislota ko‘chishi va labning qiyshayib qolishiga sabab bo‘lishi mumkin.
Plazmolifting
Plazmoliftingni amalga oshirishdan oldin bu mijozning qonidan olingan plazma ekaniga eʼtibor qaratish lozim. Shuning uchun malakali shifokor mijozdan kasalliklar va infeksiyalarga tahlil topshirishni talab qiladi. Bundan tashqari, jarayon og‘riqli o‘tishi va uzoq vaqt talab qilishi mumkin.
Yuz terisini kimyoviy pilinglash
Bu muolaja vaqtida terining zararlangan hujayralarini yo‘qotish uchun kimyoviy eritmalardan foydalaniladi. piling qo‘yilgan maqsadga qarab terining turli chuqurliklarida qilinishi mumkin.
Kimyoviy pilingdan so‘ng yuz qorayishi, qizarishi, gerpes yoki boshqa infeksiyalar uyg‘onishi mumkin. Shuningdek, piling tarkibidagi moddalar yurak, buyrak va jigarga taʼsir qilishi mumkin.
