Pokistonning sobiq bosh vaziri nega hibsga olindi?
Imron Xon chindan ham aybdormi?
Joriy hafta Pokistonda katta shov-shuvlar bilan boshlandi. Sobiq bosh vazir atrofidagi vaziyat butun mamlakatda aksiyalar to'lqinini boshlab yuborgan. Mamlakat sudi sobiq bosh vazir Imron Xonni “Al-Qodir” jamg‘armasiga aloqadorlikda ayblab, sakkiz kunga hibsga oldi. U Islomobod sud binosida qo'lga olingan. Siyosatchi u yerga o'ziga qo'yilgan bir qator jinoiy ishlar bo'yicha garov qo'yish uchun kelgandi. Imron Xon poraxo'rlik, tartibsizliklar uyushtirish hamda terrorizmda ayblanmoqda.
Muxolifat yetakchisiga xorijiy davlat rahbarlarining sovg‘alarini sotish bo‘yicha ham ayblov qo‘yilgan. Tergov ma'lumotlariga ko'ra, Xon va uning eng yaqin tarafdorlari "Al-Qodir" universitetini yaratish uchun qo'shma trest tashkil qilgan, bu esa mamlakat byudjetiga 50 milliard rupiy - deyarli 14 milliard rubl miqdorida zarar yetkazgan.
Xon, shuningdek, olingan sovg'alar haqidagi ma'lumotlarni yashirish va 630 ming dollar (ya'ni 50 million rubl) miqdoridagi davlatga tegishli qimmatbaho buyumlarini sotishda ayblanmoqda. Siyosatchining tarafdorlari ayblovlar siyosiy reja ekanligiga ishonchlari komilligini aytishdi. Shundan so‘ng Xonning “Tehrik-e-Insaf” partiyasi pokistonliklarni ko‘chaga chiqib, ommaviy namoyishlar o‘tkazishga chaqirdi.
Pokiston politsiyasi ommaviy namoyishlarni tarqatish uchun ko‘zdan yosh oqizuvchi gaz va suv purkagichlardan foydalangan. Mamlakatdagi notinchliklar fonida internet va mobil aloqa o‘chirildi. Politsiya Imron Xonni sudga zirhli yuk mashinasida olib boradi.
“Oxirgi sud majlisidan so‘ng qonun vakillariga Xonni sud binosida hibsga olmaslik haqida aniq ko‘rsatmalar berildi. Ammo ular, ya’ni inspektorlar kelib, sobiq bosh vazirni tayoq bilan kaltaklashdi, shundan so‘ng uni olib ketishdi”, - dedi Pokistonning “Tehrik-e-Insaf” partiyasi advokati Oqil Xon.
Xonning hibsga olinishi uning tarafdorlari tomonidan odam o'g'irlashdan boshqa narsa emas deb hisoblanmoqda. Siyosatchi voqealarning bunday rivojlanishiga tayyor bo'lgan ko'rinadi. Bir kun oldin Xon videomurojaat yozib qoldirgan, unda xotirjam ko'ringan va o'zining aybsizligiga ishonchi komil ekanligini aytgan.
“Bugun men Islomobodga ketyapman. Ko'p sonli Reynjerlarni joylashtirish uchun pul sarflashning hojati yo'q. Agar kimdadir mening hibsga olinishim uchun order bo'lsa, men bilan bevosita bog'laning. Men qamoqqa tushishga tayyorman”, - dedi Pokiston sobiq bosh vaziri Imron Xon.
Tergov ma’lumotlariga ko‘ra, Xon byudjetga millionlab dollar zarar yetkazgan. Ammo hamma ham bunga ishonmaydi.
“Bilasizmi, avvaliga Xon hokimiyatdan chetlashtirildi, keyin esa mamlakat boʻylab tashviqot olib borish taqiqlandi. So'ng, nihoyat, uni ikki marta o'ldirmoqchi bo'lishdi va endi uni hibsga olishdi. Shunday qilib, jarayon juda aniq", - dedi Imron Xonning sobiq maxsus yordamchisi Sayid Zulfiqor Buxoriy.
Xon va uning 17 nafar yordamchisiga qarshi terror ishi shu yilning mart oyida, siyosatchi tarafdorlari mahkama binosi oldida xavfsizlik kuchlari bilan to‘qnash kelgan kunning ertasiga ochilgan. O'shanda 50 dan ortiq politsiyachi tan jarohati oldi, bir nechta mashina va mototsikllar yoqib yuborilgan edi.
Imron Xon taxminan to‘rt yil bosh vazir lavozimida ishlagan. O‘tgan oyda mahalliy parlament unga nisbatan ishonchsizlik votumini qabul qilgan va Xon shu asosda yuqori lavozimni tark etgan birinchi bosh vazir bo‘ldi.
Xususan, mamlakat saylov komissiyasi uni deputatlik mandatidan, mamlakatning federal va mintaqaviy qonun chiqaruvchi organlariga saylanish va tayinlanish huquqidan besh yilga mahrum qildi.
Aytgancha, Xon Pokistonda hibsga olingan yettinchi sobiq bosh vazirdir. 11-may kuni esa Pokiston Oliy sudi rasmiylarga Imron Xonni zudlik bilan ozod qilishni buyurdi. Manbalarga ko'ra, Imron Xonning "al-Qodir" ishi bo‘yicha hibsga olinishi Oliy sud tomonidan “noqonuniy” deb topilgan.
