Bu yil OTMga kirish imtihonlari yopiq inshootlarda o‘tkaziladi
Buning uchun 100 ga yaqin bino tanlab olingan.
Kecha, 13 may kuni Oliy taʼlim, fan va innovatsiyalar vaziri Ibrohim Abdurahmonov rahbarligida vazirlik huzuridagi Bilim va malakalarni baholash agentligi faoliyatidagi tizimli muammolar va ularning yechimlariga bag‘ishlangan yig‘ilish o‘tkazildi. Bu haqda vazirlik matbuot xizmati xabar bermoqda.
Yig‘ilishda 2023/2024-o‘quv yili uchun respublika oliy taʼlim muassasalariga o‘qishga qabul qilish bo‘yicha test sinovlarini tashkil qilish yuzasidan amalga oshirilayotgan ishlar muhokama qilingan.
Qayd etilishicha, 2023/2024-o‘quv yili uchun test sinovlari o‘tkaziladigan 92 ta yopiq inshoot tanlab olingan hamda ularning reja chizmalari tayyorlanib, mahalliy hokimlik va idoralar bilan kelishilgan holda tasdiqlangan.
Shuningdek, test sinovlari o‘tkaziladigan 15 ta umumtaʼlim fanidan 26 520 ta va qardosh (qozoq, qirg‘iz, tojik, turkman) tillardan 2 400 ta test topshirig‘i shakllantirilgan va ekspertizadan o‘tkazilgan. Keng jamoatchilik orasidan test sinovlarida guruh nazoratchiligiga nomzod sifatida ro‘yxatdan o‘tgan 8 956 nafar talabgordan 4 000 nafarga yaqini saralab olingan va ular bilan shartnomalar rasmiylashtirilmoqda.
