Toshkent viloyatida o‘quvchilar majburiy tadbirga jalb etildi
O‘quvchilar harakati sabab serqatnov ko‘chada tirbandlik yuzaga kelgan.
Joriy yilning 8 may kuni ijtimoiy tarmoqlarda Chirchiq shahridagi 17-sonli umumtaʼlim maktabi o‘quvchilari soat 9:30da darsga kiritilmasdan, majburiy tarzda tadbirga jalb etilgani haqida tanqidiy xabar tarqalgan.
Ushbu holat yuzasidan Chirchiq shahar maktabgacha va maktab taʼlimi bo‘limi shu kunning o‘zida o‘rganish olib borgan va quyidagilarni aniqlagan. Haqiqatdan ham maktabning 1-smenada o‘qiydigan 435 nafar o‘quvchilari ishtirokida “9-may Xotira va qadrlar kuni” munosabati bilan maktabning maʼnaviy maʼrifiy-ishlar hamda o‘quv ishlari bo‘yicha direktor o‘rinbosarlari tashabbusi bilan Chirchiq shahridagi Transformator zavodi hududidagi yodgorlik majmuasiga sayohat uyushtirilgan.
O‘quvchilar harakati davomida serqatnov ko‘chada tirbandlik yuzaga kelgan. Vaziyatdan xabardor bo‘lgan shahar Maktabgacha va maktab taʼlimi bo‘limi rahbariyati shu vaqtning o‘zida o‘quvchilarni darsga qaytargan.
O‘quvchilarni maxsus ruxsatsiz dars vaqtida tadbirga jalb qilgan maktab maʼmuriyatiga shahar Maktabgacha va maktab taʼlimi bo‘limi tomonidan intizomiy chora ko‘rilgan.
