Erdog‘anning inauguratsiya marosimi qachon o‘tkazilishi maʼlum qilindi
Erdog‘an prezident saylovining ikkinchi bosqichida 52 foiz ovoz bilan g‘alaba qozongandi.
Rejep Tayyip Erdog‘anning Turkiya prezidentligiga qayta saylangani munosabati bilan bo‘lib o‘tadigan inauguratsiya marosimi 3 iyunda bo‘lishi mumkin, deb xabar berdi prezident maslahatchisi Mexmet Uchum Twitter‘dagi sahifasida.
«Agar Oliy saylov komissiyasi prezident saylovining yakuniy natijalarini 1 iyunda eʼlon qilsa, inauguratsiya marosimi 3 iyun kuni Anqarada bo‘lib o‘tadi. Shu kuni Erdog‘an yangi Vazirlar Mahkamasi ro‘yxatini ham oshkor qiladi», - deydi Uchum.
Taʼkidlanishicha, qayta saylangan prezidentning inauguratsiyasida ishtirok etadigan xorijlik yetakchilar ro‘yxati hali to‘liq shakllantirilmagan.
Maʼlumot uchun, Erdog‘an prezident saylovining ikkinchi bosqichida 52 foiz ovoz bilan g‘alaba qozongandi.
