Oliy maʼlumotli tarbiyachilar oyligi o‘qituvchilar oyligiga tenglashtiriladi
Shuningdek, maktablarda moliyaviy savodxonlik darslari o‘tiladi.
Prezidentning «Maktabgacha va maktab taʼlimi vazirligi hamda uning tizimidagi tashkilotlar faoliyatini samarali tashkil etish chora-tadbirlari to‘g‘risida»gi farmoni bilan 2024 yil 1 iyundan bog‘chalardagi oliy maʼlumotli tarbiyachilarning oyligi maktab o‘qituvchilari oyligiga tenglashtiriladi. Bu haqda Telegramdagi «Huquqiy axborot» kanali xabar berdi.
Farmonga ko‘ra, 2023/2024 o‘quv yilidan bosqichma-bosqich maktablarning 1–4-sinflarida o‘quvchilarga boshlang‘ich, 5–9-sinflarida tayanch hamda 10–11-sinf o‘quvchilarining qiziqish va qobiliyatiga mos o‘quv dasturlari va o‘quv-metodik majmualar joriy etiladi. Boshlang‘ich sinflarda informatika, o‘rta sinflarda esa moliyaviy savodxonlik darslari o‘tiladi. Shuningdek, barcha fanlar bo‘yicha amaliy mashg‘ulotlar ulushi 60 foizga yetkaziladi.
Bundan tashqari, 2024 yil 1 yanvardan maktabga birinchi marta ishga qabul qilinayotgan o‘qituvchilarni kasbiy sertifikatlash joriy etiladi. Bunda 2023/2024 o‘quv yilidan o‘qituvchilar stajyor-o‘qituvchi sifatida ishlaydi va 1 yilda sertifikat olishi talab etiladi.
