Shavkat Mirziyoyev Italiya bosh vaziri bilan uchrashdi
Muzokarada ikki mamlakat o‘rtasidagi to‘g‘ridan-to‘g‘ri aloqalarni rag‘batlantirish zarurligi taʼkidlangan.
Rim shahridagi rasmiy tadbirlar dasturiga muvofiq, O‘zbekiston Respublikasi Prezidenti Shavkat Mirziyoyev Kiji saroyida Italiya Respublikasi Vazirlar kengashi Raisi Jorja Meloni bilan muzokara o‘tkazdi.
Davlat rahbari Italiya zaminida ko‘rsatilayotgan samimiy mehmondo‘stlik uchun dildan minnatdorlik bildirdi.
Italiya O‘zbekistonning Yevropadagi muhim va ishonchli sherigi ekani, keyingi yillarda siyosat, xavfsizlik, iqtisodiyot, energetika, madaniy-gumanitar sohalardagi hamkorlik faollashgani qayd etildi.
Bugun strategik sheriklik munosabatlari o‘rnatilgach, mamlakatlar o‘rtasidagi aloqalar misli ko‘rilmagan yuksak darajaga chiqdi. Ushbu, hech mubolag‘asiz, tarixiy voqea O‘zbekiston-Italiya ko‘p qirrali hamkorligini yana-da rivojlantirishda yangi muhim bosqichning boshlanishidir.
Bosh vazir Jorja Meloni Yangi O‘zbekistonda amalga oshirilayotgan ortga qaytmas demokratik yangilanishlar va iqtisodiy islohotlarni to‘liq qo‘llab-quvvatlashini hamda ularning muvaffaqiyatiga ishonishini bildirdi.
Yetakchilar munosabatlarni ustuvor yo‘nalishlarda yana-da mustahkamlash istiqbollarini batafsil muhokama qildilar.
Savdo-iqtisodiy hamkorlikni yana-da kengaytirish asosiy vazifa ekani taʼkidlandi. O‘zaro savdo va investitsiyalar hajmi keyingi yillarda ikki barobar ko‘paydi. Metallurgiya, energetika, elektrotexnika va boshqa tarmoqlarda Italiyaning yetakchi kompaniyalari bilan sanoat kooperatsiyasi loyihalari muvaffaqiyatli amalga oshirildi.
Kuni kecha o‘tgan biznes forumi davomida jami 9 mlrd yevrodan ziyod qiymatga ega investitsiyaviy bitimlar va savdo shartnomalari imzolandi.
Amaliy hamkorlikni rivojlantirish uchun katta imkoniyatlar mavjudligini hisobga olib, tomonlar texnologik va innovatsion sheriklik bo‘yicha qo‘shma loyihalarni ilgari surish muhimligini qayd etdilar.
Ikki mamlakat hududlari o‘rtasidagi to‘g‘ridan-to‘g‘ri aloqalarni rag‘batlantirish zarurligi taʼkidlandi.
Madaniyat, italyan tilini o‘rganish, taʼlim va turizm sohalaridagi hamkorlikni rivojlantirish uchun katta salohiyat borligi ko‘rsatib o‘tildi.
Bosh vazir O‘zbekistonning Markaziy Osiyoda sheriklik, yaxshi qo‘shnichilik va ishonch muhitini mustahkamlash borasidagi saʼy-harakatlarini qo‘llab-quvvatladi hamda “Italiya – Markaziy Osiyo” hamkorlik formatini yana-da rivojlantirishga chaqirdi.
Afg‘onistondagi vaziyat yuzasidan fikr almashilar ekan, afg‘on xalqiga insonparvarlik yordamini ko‘rsatishni, shu jumladan, Termiz shahridagi logistika markazi imkoniyatlaridan foydalangan holda davom ettirish muhimligi taʼkidlandi.
Uchrashuv yakunida Prezident Shavkat Mirziyoyev Italiya Bosh vaziri Jorja Melonini tashrif bilan O‘zbekistonga kelishga taklif etdi.
