OTMda o‘qiyotgan xotin-qizlarning kontrakti soliqdan ozod qilinadi
Bu qoida yangi o‘quv yilidan amalga oshiriladi.
Yangi o‘quv yilidan boshlab, oliygohda o‘qiyotgan xotin-qizlar uchun, kim to‘lashidan qatʼi nazar, kontrakt to‘lovi daromad solig‘idan ozod qilinadi. Bu haqda Prezidentlikka nomzod Shavkat Mirziyoyev qoraqalpog‘istonlik saylovchilar bilan uchrashuvda maʼlum qildi.
Hozirda ushbu imtiyoz farzandi va turmush o‘rtog‘i uchun kontrakt to‘laganlarga qo‘llanilar edi.
Shuningdek, Qoraqalpog‘istonda agro-texnologiyalar va muhandislik yo‘nalishlarida yetakchi xorijiy oliygohlarning filiallari hamda Nukusda Raqamli texnologiyalar instituti ochiladi.
“Umuman, biz Qoraqalpog‘istonda oliy taʼlim qamrovini kelgusi yilning o‘zida 50 foizga yetkazamiz. Buning uchun, chet ellarda o‘qiyotgan yoshlarimizning o‘qishini yurtimiz oliygohlariga davlat granti asosida ko‘chirish amaliyotini yo‘lga qo‘yamiz”, — deb taʼkidladi nomzod.
Taʼlim sohasining asosiy tayanchi bo‘lgan aziz va moʻtabar muallim va murabbiylar, oliygoh professor-o‘qituvchilarining mashaqqatli mehnati bundan buyon ham munosib rag‘batlantirib boriladi.
