O‘zbekistonda havo harorati pasayishi kutilmoqda
Respublikaga Kavkaz hududlaridan nisbatan biroz salqin havo kirib kelishi hisobiga issiq biroz pasayadi.
Kavkaz hududlaridan O‘zbekistonga nisbatan biroz salqin havo kirib kelishi hisobiga 20-iyundan boshlab issiq biroz pasayadi. Natijada havo harorati ish haftasining oxirigacha 33-38 daraja atrofida bo‘ladi. Respublikaning janubiy hududlarida issiq havo massasining taʼsiri saqlanib turadi. Harorat asosan 39-41 daraja, Surxondaryo viloyatida hafta o‘rtasiga kelib, baʼzi joylarda 42-44 darajagacha bo‘ladi.
"Shuningdek, 20-iyunda Farg‘ona vodiysi viloyatlarida, Toshkent viloyatining baʼzi joylarda qisqa muddatli yomg‘ir yog‘ishi, momaqaldiroq bo‘lishi mumkin. Haftaning birinchi yarmida ob–havoning beqarorligi respublikaning tog‘ oldi va tog‘li hududlarida saqlanib turadi – baʼzi joylarda qisqa muddatli momaqaldiroqli yomg‘irlar yog‘adi. Bugun kunning ikkinchi yarmida va ertaga baʼzi joylarda yomg‘ir kuchli yog‘adi, do‘l yog‘ishi ehtimoldan holis emas", — deyiladi “O‘zgidromet” xabarida.
Qayd etilishicha, 19-20-iyun kunlari respublika bo‘yicha baʼzi joylarda, 23-iyunda janubda va cho‘l hududlarda shamolning kuchayishi, ayrim joylarda chang-to‘zon bilan kuzatilishi kutilmoqda.
Toshkent shahrida havo harorati ish haftasining oxirigacha 35-37 daraja atrofida bo‘ladi.
