Toshkentda ichida odamlar bo‘lgan lift pastga tezlik bilan tushib ketdi
Hodisa oqibatida jarohatlanganlar bor.
Kecha, 18 iyun kuni Toshkent shahrining Yangihayot tumanidagi ko‘p qavatli uylarning birida liftda nosozlik yuz berib, odamlar jarohatlandi.
FVV xabariga ko‘ra, soat 16:15 larda Yangihayot tumani “Yangi Darxon” MFY Navro‘z ko‘chasida joylashgan ko‘p qavatli uyning yuk tashish uchun mo‘ljallangan lifti yuqoridan pastga tushayotgan vaqtida texnik nosozlik tufayli tezlashib, 1-qavatga yaqinlashganda liftning avtomatik tormoz tizimi ishga tushib to‘xtagan.
Oqibatda liftda bo‘lgan 11 nafar fuqaro turli darajada yengil tan jarohati olib, RSHTYOIMga olib ketilgan.
Hozirda shifoxonadan 8 nafar fuqarolarga uyiga javob berilgan, qolgan 3 nafar fuqarolarga tibbiy yordam ko‘rsatilmoqda.
Voqea joyiga FVV xodimlari, shahar va tuman FVB rahbariyati, IIB, Prokuratura hamda SSB xodimlari chiqishgan.
