Favvoralarda cho‘milmang! Mutaxassis jiddiy tavsiya bilan chiqdi

 

Jazirama zabtiga olgan shu kunlarda cho‘milish havzalari juda gavjum. Hatto shaharu tuman markazlarida yon-atrofga salqinlik taratib turgan baʼzi favvoralar hovuzlarida ham bolajonlarni uchratyapmiz. Ammo shifokorlar bunday havzalarda cho‘milish salomatlik uchun zararli, degan xulosada.

 

Sanitariya-epidemiologiya qo‘mitasi bo‘lim boshlig‘i Dilorom Tursunova qator tavsiyalar berdi.

 

Favvoralar — havoni namlantirib turish va yon-atrofga estetik ko‘rk bag‘ishlash maqsadida barpo etiladi. Ular cho‘milish uchun mo‘ljallanmagan.

 

Bunday obyektlar suvi basseynlar singari tez-tez almashtirilmaydi va zararsizlantirilmaydi. Shu bois issiqda ularda mikroorganizmlar tez va oson ko‘payadi.

 

Oqibatda favvorada cho‘milish o‘tkir virusli ichak infeksiyalari, gepatit (A,E), ichburug‘, ichterlama, lyamblioz kabi xavfli kasalliklar kelib chiqishiga sabab bo‘ladi.

 

Qolaversa, bunday havzalarga turli kommunikatsiya va yoritish moslamalari o‘rnatilgan bo‘lishi mumkin. Bu esa suv ostidagi konstruksiyalarga qoqilib, jarohat olish xavfini oshiradi.

 

Yana bir omil: fontanlar — qushlar, it va mushuklar hamda boshqa jonivorlar chanqog‘ini qondirishi, cho‘milishi, sho‘ng‘ishi uchun ochiq hamda qulay manba. Bu esa mazkur havzalarga turli lichinkalar tushishiga olib keladi.

 

Agar shunday ifloslangan suvga bolalar, ayniqsa, badanida turli yara va jarohatlari bor o‘g‘il-qizlar tushsa, teri kasalliklarini keltirib chiqaruvchi stafilokokk, streptokokk, enteraviruslar va boshqa parazit hamda mikroblarni yuqtirib olishi oson.

 

Bunday muhit burun, og‘iz va quloq shilliq qavatlari yallig‘lanishiga ham olib kelishi ehtimoli mavjud.

 

O‘z navbatida, yomg‘ir suvi favvoralarga qo‘shilishi ular tarkibida zararli kimyoviy aralashmalar paydo bo‘lishiga olib kelishini unutmaslik kerak.

 

Ayni sababdan, avvalo, taqiqlangan, ifloslangan, tekshirilmagan va notanish suv havzalariga tushmaslikni tavsiya etamiz.

 

Agar ochiq havzalarda cho‘milish vaqtida va undan keyin holsizlik, ko‘ngil aynishi, qusish, tana harorati ko‘tarilishi, ich ketishi, qorin dam bo‘lishi kabi alomatlar yuzaga kelsa, darhol shifokorga murojaat qilish lozim.