Buxoroda 4 kunlik chaqaloq ko'chaga tashlab ketildi
Aniqlanishicha, chaqaloq yashash xonadonida tibbiyot xodimlarining yordamisiz tug‘ilgan hamda onasi tomonidan tashlab ketilgan.
Ijtimoiy tarmoqlarda ko'chaga tashlab ketilgan chaqaloq suratlari tarqaldi. Holat yuzasidan Buxoro IIB batafsil ma'lumot berdi.
Ma'lum qilinishicha, 8-avgust kuni soat 01:30 larda Qorako‘l tumani markazida tungi xizmatga jalb etilgan viloyat IIB JXX JTSB PPX bataloni tumanlararo bo‘linmasi safdor xodimi Shahzod Saidov hamda tuman IIB JXX HPB profilaktika inspektori katta leytenant Habib Abdurahmonovlar o‘zlariga biriktirilgan hududda xizmat olib borayotganlarida tuman Markaziy kasalxonasi yaqinida chaqaloq yig‘isini eshitib qolishadi.
Natijada yaqin atrof ko‘zdan kechirilganida devor yonida yashil rangli paket ichida o‘g‘il bola jinsiga mansub, taxminan 3-5 kunlik sog‘lom holatdagi chaqaloq borligi aniqlangan.
Shu paytning o‘zida chaqaloq ichki ishlar organlari xodimlari tomonidan tuman Tibbiyot birlashmasi Bolalar bo‘limiga yotqizilib, zaruriy birinchi tibbiy yordam ko‘rsatilgan va soha mutaxassislari nazoratiga olingan.
Mazkur holat yuzasidan olib borilgan surishtiruv harakatlari davomida ushbu chaqaloq 4-avgust kuni yashash xonadonida hech qanday tibbiyot xodimlarisiz soat taxminan 08:00 lar atrofida dunyoga keltirilgan va 7-avgust kuni soat 21:00 atrofida 1995-yilda tug‘ilgan onasi tomonidan tashlab ketilgani aniqlangan.
