Toshkent viloyatida ekoinspektor kaltaklandi
Holat yuzasidan jinoyat ishi qo‘zg‘atildi.
Toshkent viloyati Ekologiya boshqarmasi Ohangaron tumani inspektoriga xizmat vaqtida tan jarohati yetkazilgani yuzasidan jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.
Qayd etilishicha, voqea 10-avgust kuni sodir bo‘lgan. Unga ko‘ra, Toshkent viloyati ekologiya atrof-muhitni muhofaza qilish va iqlim o‘zgarishi boshqarmasi Ohangaron tumani inspeksiyasi masʼul xodimi “Oybuloq” mahallasida joylashgan fermer xo‘jaligidagi dala maydonida xizmat vazifasini bajarayotgan vaqtida ushbu mahallada yashovchi fuqaro uni urib tan jarohati yetkazib, xizmat guvohnomasi hamda ish hujjatlarini tortib olib, hujjatlariga shikast yetkazgan.
Bosh prokuratura xabariga ko‘ra, mazkur holat yuzasidan Ohangaron tumani prokuraturasi tomonidan Jinoyat kodeksining 219 (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va boshqa moddalar bilan jinoyat ishi qo‘zg‘atilgan.
