Ekologik auditorga malaka sertifikati berish bo‘yicha davlat xizmatlari ko‘rsatiladi

 

19 avgust kuni Hukumat qarori  bilan Ekologik auditorning malaka sertifikatini berish bo‘yicha davlat xizmatlarini ko‘rsatishning maʼmuriy reglamenti tasdiqlandi.

 

Qarorga muvofiq, ekologik auditorning malaka sertifikatini berish uchun malaka imtihonini tashkil etish, sertifikatni berish, ekologik auditorlar va ekologik auditorlik tashkilotlarining reyestrlari yuritish bo‘yicha Ekologiya, atrof-muhitni muhofaza qilish va iqlim o‘zgarishi vazirligi vakolatli organ hisoblanadi.

 

Maʼmuriy reglamentga ko‘ra, malaka sertifikatini berish bo‘yicha xizmatlar davlat xizmatlari markazi yoki YAIDXP (my.gov.uz) orqali ko‘rsatiladi.

 

Buning uchun talabgor:

 

—Ekologiya va atrof-muhitni muhofaza qilish sohasiga oid (biolog, geolog, gidrolog muhandis, yer geodeziya va kartografiyasi muhandisi, shuningdek, suv, atmosfera, yer va yer osti boyliklari muhofazasi mutaxassisliklari) oliy maʼlumotli;

 

—sohada yoki turdosh sohalarda ketma-ket kamida 3 yillik ish tajribasiga ega bo‘lishi kerak.

 

Vakolatli organ murojaat kelib tushgan kundan boshlab 10 ish kuni mobaynida talabgorga malaka imtihonini topshirishga ruxsat berish yoki uni rad etish to‘g‘risida qaror qabul qiladi.

 

Malaka imtihoni kamida 3 nafar talabgordan iborat guruhning shakllanishiga ko‘ra, biroq har chorakda kamida bir marta o‘tkaziladi.

 

Imtihon test ko‘rinishida olinadi (jami 50 ta nazariy savol).

 

Imtihondan muvaffaqiyatli o‘tgan shaxsga ekologik auditor malaka sertifikati berilib, sertifikat 5 yil muddatga amal qiladi.

 

Talabgorning murojaatini ko‘rib chiqish bo‘yicha davlat xizmati ko‘rsatilganligi uchun BHMning 1 baravari (330 ming so‘m) miqdorida yig‘im undiriladi.

 

Reglamentga ko‘ra shuningdek, ekologik auditorlar har ikki yilda bir marta malaka oshirish kurslaridan o‘tishlari shart.