O‘zbekiston Afg‘onistonga dori mahsulotlari yetkazib beradi
Ikki mamlakat farmatsevtika hamda sog‘liqni saqlash sohasida hamkorlikni kengaytirishga kelishib oldi.
Afg‘onistonga O‘zbekistondan yiliga o‘rtacha 1 mln dollarlik protein va vitamin komplekslarini yetkazib berish bo‘yicha kelishuvlarga erishildi. Bu haqda Farmatsevtika tarmog‘ini rivojlantirish agentligi хаbar berdi.
O‘zbekiston vazirlik va idoralari mas’ullaridan iborat bir guruh vakillar Afg‘onistonda bo‘ldi. Delegatsiya tarkibida Farmatsevtika tarmog‘ini rivojlantirish agentligi boshqarmasi boshlig‘i Sherzod Yakubov ham bo‘lib, farmatsevtika va sog‘liqni saqlash sohasida Afg‘oniston va O‘zbekiston o‘rtasidagi hamkorlik masalalarida muzokaralar olib bormoqda.
“Afg‘onistonning ‘Fyucher Vels Trayding’ kompaniyasi direktori G.Fahim bilan O‘zbekistondagi ishlab chiqaruvchilar tomonidan yiliga o‘rtacha 1 mln dollarlik protein va vitamin komplekslarini yetkazib berish bo‘yicha kelishuvlarga erishildi”, - deyiladi xabarda.
Xususan, Afg‘oniston Aholi salomatligi vazirligining farmatsevtika xizmatlari direktori Hamid Furmuli bilan mazkur mamlakatdagi “Ibn Sino” korxonasi negizida shartnoma tuzish masalalari muhokama qilindi. Bundan tashqari, stomatologiya xizmatlari ko‘rsatish bo‘yicha Kobul shahrida atigi bitta korxona faoliyat ko‘rsatib kelayotgan bo‘lib, uchrashuvlar davomida Afg‘oniston tibbiyot xodimlarini “Health manager” bo‘yicha malakasini oshirish, qisqa muddatli kurslarda o‘qitish masalalari kelishib olindi.
Mazkur holatlar e’tiborga olinib, O‘zbekistonda ishlab chiqarilgan dori mahsulotlarini ushbu mamlakat bozoriga yetkazish borasida Afg‘oniston “Oziq-ovqat va dori vositalarini sifatini nazorat qilish” milliy uyushmasi raisi bilan samarali muzokaralar olib borildi.
