“Tashabbusli budjet” xakerlik hujumiga uchradi
Bu haqda Iqtisodiyot va moliya vazirligi xabar berdi.
"Tashabbusli byudjet" jarayonining 2023-yil 2-mavsumi doirasida ovoz berish bosqichi 27-avgustdan boshlandi. Ovoz berish jarayonlarining dastlabki kunlari foydalanuvchilar tomonidan tizimda ayrim texnik muammolar kuzatilayotgani bo‘yicha eʼtirozlar bildirildi.
Iqtisodiyot va moliya vazirligining maʼlum qilishicha, ushbu holat ovozlar sonini sunʼiy ravishda ko‘paytirish maqsadida ishlab chiqilgan norasmiy botlar orqali ovoz yig‘ish, shuningdek, turli xil spam va xakerlik hujumlari oqibatida yuzaga kelgan.
Xabarda bu kabi urinishlarning oldini olish uchun qo‘yilgan cheklovlar natijasida axborot portalida bir qator uzilishlar ro‘y bergani aytildi.
Hozirda barcha zaruriy texnik choralar ko‘rilib, axborot portali faoliyati moʻtadillashtirilgani maʼlum qilingan.
