Xitoyda O‘zbekiston liboslari namoyish etiladi
Ko‘rgazma sentyabr oyida Xanchjouda ochiladi.
Xitoyning Xanchjou shahrida bo‘lib o‘tadigan ko‘rgazmada mamlakat muzeylaridan yigirmaga yaqin o‘zbek liboslari namoyish etiladi. Tadbir 2 sentyabrdan 12 noyabrga qadar bo‘lib o‘tadi. Bu haqda Madaniyat va sanʼatni rivojlantirish milliy jamg‘armasi maʼlum qildi.
“Rangli Osiyo: Osiyo liboslari ko‘rgazmasi”da 150 ga yaqin eksponatlar namoyish etiladi. Bular Osiyoning turli burchaklaridan keltiriladi.
O‘zbekistondan chopon, so‘zan va taqinchoqlar kabi 20 turdagi kiyim-kechak taqdim etiladi. Ularning barchasi odatda Samarqand muzey-qo‘riqxonasi va O‘zbekiston davlat sanʼat muzeyida saqlanadi.
Bundan tashqari, ko‘rgazma doirasida “O‘zbekiston kechasi” tadbiri ham o‘tkaziladi. Uning ishtirokchilari o‘zbek matolarini tayyorlash jarayonini ko‘rishlari mumkin bo‘ladi.
