“Isteʼfoga chiqmaysizmi, janob?”
Gazetada XDP lideri Ulug‘bek Inoyatovning isteʼfosi talab qilindi.
«Surxon ovozi» gazetasining 2023 yil 5 sentyabr kuni nashr etilgan 8-sonida Xalq demokratik partiyasi Markaziy Kengashi rahbari Ulug‘bek Inoyatovning isteʼfosi talab qilingan maqola eʼlon qilindi.
Unda yozilishicha, Inoyatov o‘tgan prezidentlik saylovida nomiga ishtirok etgan, hokimiyat tizimi faoliyatini hamda raqiblar dasturini taftish qilmagan.
“Saylovoldi dasturingizda hech qanday yangi fikr, yangi g‘oyani ko‘rmadik. Quruq safsatadan nariga o‘tilmadi va shunga yarasha ‘mukofot‘ini ham oldingiz. Ovoz berish natijalari buning dalili.
Saylovdagi befarqligingiz tufayli XDPning mavqeiga putur yetdi. Partiyadoshlaringiz, qolaversa, saylovchilar ishonchini oqlay olmadingiz.
Shunday ekan, partiya Markaziy Kengashi raisi vazifasidan isteʼfoga chiqsangiz, mardning ishi bo‘lar edi», – deydi muallif.
