Parkentda II–VI-asrlarga tegishli qabr topildi
Qabr ichidan qo‘lda yasalgan sopol idishlar ham chiqqan.
Toshkent viloyatining Parkent tumanidagi “Kumushkon” MFYda II–VI-asrlarga tegishli qabr topildi. Bu haqda “O‘zA” xabar berdi.
“Kumushkon” MFY Birdamlik ko‘chasidagi yo‘l chetida ichimlik suvi o‘tadigan polietilen trubalarni yer ostiga ko‘mish uchun qazilganda yerning ustki sathidan 50 sm pastlikdan o‘tov shaklidagi bo‘shliq ochilib qolgan. Bo‘shliqdan to‘qqiz dona sopol idishlar topilgan.
Arxeologlar tomonidan yuqorida manzili ko‘rsatilgan joy tekshirilganda balandligi —1.5 – 1.6 m, diametri 1.8 – 1.9 m, ichki shifti gumbaz shaklida bo‘lgan yer osti qurilmasi qadimiy qabr qo‘rg‘oni bo‘lgani aniqlandi.
Qabrdan olingan sopol idishlar marhumlarni dafn etish chog‘ida qabrning chetlariga qo‘yib chiqilgan bo‘lgan. Ularning barchasi qo‘lda, yaʼni kulolchilik charxi yordamisiz yasalgan. Idishlarning ustiga qizg‘ish rangdagi suyuq angob (bo‘yoq) surtilgan. Ularni yasashda loyiga mayda qum-toshlar, maydalangan ohaktoshlar aralashtirilgan.
Bu topilgan idishlarning uch donasi bir baldoqli ko‘za, bir donasi ikki baldoqli tuvak, ikki donasi bir baldoqli qadah (krujka), ikki donasi kosa va bir donasi piyola bo‘lib, aftidan ular suyuqlik quyilib qabrga qo‘yilgan. Suyuqliklar uzoq yillar davomida parlanib yo‘q bo‘lib ketgan. Faqatgina ko‘zalardan birida sut qaymog‘ining kukun shaklidagi qoldiqlari saqlangan.
