BAAda tazyiqqa uchragan ikki o‘zbekistonlik vatanga qaytarildi
O‘zini ish beruvchi deb atagan shaxs o‘zbekistonliklarning shaxsini tasdiqlovchi hujjatlari olib qo‘ygan va turli bahonalarni ro‘kach qilib qaytarib bermagan.
O‘zbekiston diplomatlari Birlashgan Arab Amirliklarda qiyin ahvolda tushib qolgan o‘zbekistonliklar M.U. va D.K.ni vatanga qaytishida amaliy yordam ko‘rsatdi, deb xabar bermoqda «Dunyo».
M.U. va D.K. Bosh konsullikka qilgan murojaatida BAAga yolg‘on va’dalarga ishonib kelib qolganlarini va ish beruvchi tomonidan doimiy ravishda tazyiq o‘tkazilayotganini bayon etgan.
Jumladan, o‘zini ish beruvchi deb atagan shaxs o‘zbekistonliklarning shaxsini tasdiqlovchi hujjatlari olib qo‘ygan va turli bahonalarni ro‘kach qilib qaytarib bermagan.
O‘zbekiston diplomatlari tomonidan ko‘rilgan chora-tadbirlar natijasida M.U. va D.K.ning pasportlari qaytarib olindi. Faol vatandoshlar ko‘magida ularning vatanga qaytishi uchun bepul aviachipta olib berildi.
O‘zbekistonliklar Uzbekistan Airways kompaniyasining Dubay-Toshkent havo qatnovi bilan O‘zbekistonga kuzatib qo‘yildi.
