To'xtab qolgan yo'l qurilishi qachon davom ettiriladi?
“Sho'rcha-Nurdum-Jarquduq” avtomobil yo'lini ta'mirlash uchun 24,8 mlrd so'm mablag' ajratilgan.
Shu yilning iyun oyida Samarqand viloyatining Nurobod tumanida joylashgan 4N-553 “Sho'rcha-Nurdum-Jarquduq” avtomobil yo’lining 31 km qismida joriy ta'mirlash ishlari boshlangan. Hudud aholisining Zamon.uz nashriga yo'llagan murojaatiga ko'ra, ma'lum vaqt o'tib yo'l qurilishi to'xtab qolgan.
Ushbu holat bo'yicha Zamon.uz muxbiri mutasaddilar bilan bog'lanib, ayrim savollarga javob olishga harakat qildi.
Nurobod tuman yo‘llardan foydalanish korxonasi davlat muassasasi direktori Maruf Rayimshukurovning ma'lum qilishicha, Nurobod TYFK DM balansida bo'lgan 4N-553 "Sho'rcha - Nurdum - Jarquduq" mahalliy ahamiyatga ega avtomobil yo'lining 0-31 km qismini joriy ta'mirlash O'zbekiston Respublikasi Vazirlar Mahkamasining 2022-yil 2-noyabrdagi №635-son qarori asosida davlat dasturiga kiritilgan.
Mazkur yo'lni joriy ta'mirlash uchun 24,8 mlrd so'm mablag' ajratilishi va moliyalashtirish Iqtisodiyot va moliya vazirligi tomonidan amalga oshirilishi ko'zda tutilgan.
Qayd etilishicha, Iqtisodiyot va moliya vazirligi tomonidan Respublika byudjetidan hozirgi kunda 1,485 mlrd so'm mablag' ajratilgan bo'lib, ayni vaqtda ushbu mablag'lar hisobidan yo'lda mavjud eski, yaroqsiz asfalt qoplamani kesib olish hamda yo'l asosini ko'tarish ishlari amalga oshirilgan.
Mutasaddilarning aytishicha, mazkur “Sho'rcha-Nurdum-Jarquduq” avtomobil yo'lida shu yilning o'zida ta'mirlash ishlarini boshlash rejalashtirilgan. Biroq, belgilangan mablag'lar ajratilmasa, qurilish keyingi yilga ham qoldirilishi mumkin.
