Kelasi yil O‘zbekistonda MDH adliya vazirlari yig‘iladi

 

Mustaqil Davlatlar Hamdo‘stligi (MDH) ishtirokchi davlatlari adliya vazirlari Kengashining 18-majlisi 2024 yilda O‘zbekistonda o‘tkaziladi.

 

Tojikistonning Dushanbe shahrida MDH ishtirokchi davlatlari adliya vazirlari Kengashining o‘n yettinchi majlisi bo‘lib o‘tdi. Unda O‘zbekiston adliya vaziri Akbar Tashkulov ishtirok etdi.

Majlis davomida Kengash a’zolari 2024 yilda MDHga a’zo davlatlar adliya vazirlari kengashiga raislik qilish O‘zbekistonga o‘tishi, 2024 yil uchun Kengashning Chora tadbirlar rejasining qabul qilinishi, 2027 yilni MDHda Huquqiy ma’rifat yil deb e’lon qilish va boshqa masalalarni muhokama qilishdi.

Adliya vaziri Tashkulov o‘z so‘zida O‘zbekistonda yuridik xizmat, aholiga davlat xizmatlarini ko‘rsatish hamda normativ-huquqiy hujjatlarni optimallashtirish borasida erishilgan yutuqlar haqida to‘xtalib o‘tdi.

 

"MDH ishtirokchi davlatlari adliya vazirlari Kengashining 18-majlisini 2024 yilda O‘zbekistonda o‘tkazishga kelishib olindi", — deyiladi xabarda.

 

Ma’lumot uchun, Adliya vazirlari Kengashi MDH ishtirokchi davlatlarning davlat rahbarlari Kengashi va davlat hukumatlari rahbarlari Kengashining organi hisoblanib, o‘z vakolati doirasidagi masalalar, jumladan, adliya vazirliklari bilan hamkorlik qilish, MDH ishtirokchi davlatlari qonunchiligini uyg‘unlashtirish, ishtirokchi-davlatlarning huquqiy siyosatini shakllantirish va amalga oshirish kabi va boshqa masalalar bilan shug‘ullanadi.

MDH Kengash a’zolari qatoriga O‘zbekiston 2019 yilda a’zo bo‘lgan. MDH Kengashiga Armaniston, Belarus, Qirg‘iziston, Rossiya, Tojikiston va O‘zbekiston adliya vazirlari kiradilar.