Belgilanmagan joyga chiqindi tashlagan shaxsning yuk mashinasi musodara qilindi

 

Qayd etilishicha, tumanning "Qorasaroy" mahallasidan oqib o‘tuvchi suv bo‘yiga qurilish chiqindilari to‘kib ketilgan. Mazkur holat esa hududdagi xonadonlardan biriga o‘rnatgan kuzatuv kamerasiga tushib qolgan.

 

Tezkor ekologik surishtiruv ishlari natijasida chiqindilarni shu mahallaning Istiqlol ko‘chasida yashovchi fuqaro A.T. o‘zining "Zil" yuk mashinasi yordamida tashlagani aniqlangan.

 

Ta’kidlanishicha, A.T. avval ham shunday huquqbuzarlik sodir etgan va 2023-yilning 7-sentabr kuni Ma’muriy javobgarlik to‘g‘risidagi kodeksning 91-1- moddasi (Belgilanmagan joylarga qattiq maishiy chiqindilarni va qurilish chiqindilarini tashlash, shuningdek suyuq maishiy chiqindilarni to‘kish) 3-qismi bilan dalolotnoma tuzilib, bazaviy hisoblash miqdorining besh barobarida – 1 million 650 ming so‘m jarima qo‘llanilgan. Oradan 8 kun o‘tib esa fuqaro tomonidan takroriy huquqbuzarlik sodir etilgan.

 

Ma’lumot uchun, Ma’muriy javobgarlik to‘g‘risidagi kodeksning yuqoridagi moddasiga ko‘ra, huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, huquqbuzarlik quroli musodara qilinishi belgilab qo‘yilgan.

 

Shunga asosan, ayni damda A.T.ning transport vositasi vaqtincha saqlash uchun jarima maydonchasiga qo‘yilib, musodara qilinishi yuzasidan hujjatlar to‘plangan va sudga da’vo arizasi kiritilayotgani ma’lum qilingan.