So‘nggi 30 yildagi ilk tashrif: BMT missiyasi Tog‘li Qorabog‘ga keldi
Bundan ko‘zlangan asosiy maqsad — zarur insonparvarlik yordami hajmini baholashdir.
Ozarboyjonning mintaqadagi harbiy amaliyotidan so‘ng arman aholisi tomonidan deyarli butunlay tashlab ketilgan Tog‘li Qorabog‘ga BMT missiyasi 30 yil ichida birinchi marta yetib keldi. Uning kelishi haqida 1 oktyabr kuni Boku rasmiylari xabar berdi.
Qayd etilishicha, BMT missiyasining asosiy maqsadi zarur insonparvarlik yordami hajmini baholashdan iborat. O‘z navbatida, Tog‘li Qorabog‘dan o‘n minglab qochqinlarni qabul qilgan Armanistonda 1 oktyabr kuni Arsax (Tog‘li Qorabog‘) uchun milliy ibodat kuni bo‘lib o‘tdi. Butun mamlakat bo‘ylab ibodatxonalarda qo‘ng‘iroqlar chalindi. Barcha armanlarning oliy patriarxi Garegin II o‘z qarorgohi joylashgan Echmiadzin shahrida marosim o‘tkazdi.
Eslatib o‘atmiz, Yerevan Ozarbayjonni Tog‘li Qorabog‘ hududidagi harakatlarda aybladi. 29-sentabr kuni Armaniston Ozarbayjonga qarshi BMT Xalqaro sudiga daʼvo arizasi bilan murojaat qilib, irqiy kamsitishning barcha shakllariga barham berish to‘g‘risidagi xalqaro konvensiyaga rioya etishni talab qildi.
Bundan tashqari, Yerevan Bokuni BMT va Qizil Xoch xodimlarining mintaqadagi arman aholisi bilan muloqotni taʼminlashga, tan olinmagan Tog‘li Qorabog‘ Respublikasi rasmiylari tomonidan berilgan fuqarolik holati dalolatnomalari guvohnomalarini haqiqiy deb tan olishga va arman madaniy merosining yodgorliklarini buzishni taqiqlashga chaqirdi.
Boku Tog‘li Qorabog‘dagi etnik armanlar haqidagi ayblovlarni rad etib, ularning huquqlari hurmat qilinishini bildirdi.
