HAMAS Moskvada. Kutilmagan tashrifdan maqsad nima?
Isroil bu tashrifdan Rossiyaga keskin norozilik bildirdi.
HAMAS delegatsiyasi Moskvaga tashrif buyurdi. RIA Novosti maʼlumotlariga ko‘ra, delegatsiyaga HAMAS siyosiy byurosi aʼzosi Abu Marzuk boshchilik qilmoqda. Rossiya Tashqi ishlar vazirligi HAMAS vakillarining Moskvaga tashrifini tasdiqladi. Tashrif maqsadlari aniqlashtirilmagan.
Rossiya anʼanaviy ravishda HAMAS bilan aloqalarni davom ettirmoqda. Dunyoning boshqa ko‘plab davlatlaridan farqli o‘laroq, bu guruh Rossiya Federatsiyasida terrorchi hisoblanmaydi. HAMAS delegatsiyalari muntazam ravishda Moskvaga tashrif buyurishadi. Bu safar G‘azo sektorida jangarilarning Isroilga hujumi va asirlarni garovga olishi oqibatida yuzaga kelgan yangi urush boshlanganidan beri birinchi tashrif bo‘ldi.
Rossiya Tashqi ishlar vazirligi HAMAS delegatsiyasi bilan muzokaralar mavzularidan biri haqida gapirdi:
"HAMAS islomiy qarshilik harakati Siyosiy byurosi aʼzosi Abu Marzuk Moskvada. U bilan G‘azo sektorida joylashgan xorijlik garovga olinganlarni zudlik bilan ozod qilish bo‘yicha Rossiya liniyasining davomi bo‘yicha aloqalar bo‘lib o‘tdi hamda Rossiya va boshqa xorijiy fuqarolarni Falastin anklavidan evakuatsiya qilishni taʼminlash masalalari muhokama qilindi", — deyiladi Rossiya Tashqi ishlar vazirligi bayonotida.
Isroil tomoni esa HAMAS vakillarini Moskvaga borgani munosabati bilan Rossiyaga keskin norozilik bildirdi.
"Isroil XAMASning yuqori martabali mulozimlarini Moskvaga taklif qilishni terrorizmni qo‘llab-quvvatlovchi va HAMAS terrorchilarining vahshiyliklarini qonuniylashtiradigan nomaqbul qadam deb hisoblaydi", — deydi Isroil Tashqi ishlar vazirligi matbuot kotibi Lior Hayat.
