O‘zbekistonda salkam 7 mingta maktab ko‘mirda isitiladi
Maktablarga joriy yil kuz-qish mavsumi uchun 202,9 ming tonna ko‘mir yetkazib berildi.
O‘zbekistonda mavjud 10 118 ta maktabning 6 807 tasi yoki 67,3 foizi ko‘mir yoqilg‘isida isitiladi. Bu haqda Maktabgacha va maktab taʼlimi vazirligi xodimi Dilfuza Sobirova taʼlim muassasalarini kuz-qish mavsumiga tayyorlash bo‘yicha amalga oshirilayotgan ishlar haqidagi maʼlumotlarida keltirib o‘tdi.
Shuningdek, jami maktablarning 3 284 tasi (32,5 foizi) tabiiy gazda, 23 tasi (0,2 foizi) suyuq yoqilg‘ida va 4 tasi elektr energiyasida isitiladi.
Qayd etilishicha, maktablarga joriy yil kuz-qish mavsumi uchun 202,9 ming tonna ko‘mir yetkazib berildi (rejadagi taʼminot 100 foiz bajarilgan).
Maktabgacha taʼlim tashkilotlari uchun esa 58,1 ming tonna ko‘mir yoqilg‘i mahsulotlari jamg‘arilishi belgilangan va ayni vaqtda bu boradagi ishlar ham to‘liq tugallangan.
Dilfuza Sobirovaga ko‘ra, Prezidentning 2023 yil 16 fevraldagi 57-son qarori bilan bu yil 4 491 ta maktab va bog‘chalarning lokal isitish tizimlari ko‘mir yoqilg‘isiga o‘tkazilishi kerak edi. Hozirga qadar mahalliy hokimliklar tomonidan 926 ta maktab va 1 161 ta maktabgacha taʼlim tashkilotlarining isitish tizimlari gazdan ko‘mir yoqilg‘isiga o‘tkazilgan.
