Qirg‘izistonda qizamiq avj olmoqda: 2 ta maktab onlayn taʼlimga o‘tdi
Bu haqda mamlakat Taʼlim va fan vazirligi maʼlum qildi.
Jalolobod shahrida xavfli virusli kasallik – qizamiq tarqalishi sababli ikkita maktab masofaviy taʼlimga o‘tkazildi, deya maʼlum qildi Qirg‘iziston Respublikasi Taʼlim va fan vazirligi.
Maʼlumotlarga ko‘ra, bunday qaror epidemiya va epizootiyaga qarshi maxsus komissiya tomonidan chiqarilgan.
“Shunday qilib, Q.Zokirov nomidagi 2-umumtaʼlim maktabi va A.Usmonova nomidagi 7-maktab o‘quvchilari qizamiq kasalligi tarqalishi sababli masofaviy taʼlimga ko‘chirildi”, — deyiladi xabarda.
Shuningdek, mazkur qaror bilan Jalolobod shahar taʼlim bo‘limiga ushbu kasallikka qarshi emlashdan bosh tortgan yoki 063-son shakl bo‘yicha bir martalik emlangan o‘quvchilar soniga aniqlik kiritish, har bir maktab va bolalar bog‘chasida tibbiy ko‘rikdan o‘tish va emlash uchun alohida xonalarni jihozlash topshirildi.
