Gollivud aktyorlari ish tashlashni tugatdi
Aktyorlar kasaba uyushmasi ish beruvchilar bilan umumiy qiymati 1 milliard dollardan oshiq «favqulodda miqyosdagi» kelishuvga erishdi.
AQSH Televideniye va radio artistlari federatsiyasi hamda Kinoaktyorlar gildiyasi (SAG-AFTRA) Kino va televideniye prodyuserlari alyansi (AMPTP) bilan o‘z aʼzolariga 9 noyabr, payshanba kunidan boshlab 118 kunlik ish tashlashni tugatishga imkon beruvchi taxminiy kelishuvga erishganini maʼlum qildi. SAG-AFTRA‘ning X (sobiq - Twitter) sahifasida eʼlon qilingan bayonotda: "biz 1 milliard dollardan ortiq favqulodda qiymatdagi kelishuvga erishdik", deyiladi.
Shartnoma minimal to‘lovlarni oshirishni, federatsiya aʼzolarini "sunʼiy intellekt tahdidlari"dan himoya qilish choralarini o‘z ichiga oladi va birinchi marta "oqimli efirdagi ishtirok uchun bonusni" o‘z ichiga oladi.
Taxminan 160 000 kishidan iborat aktyorlar kasaba uyushmasi 14 iyul kuni ish tashlashni boshladi, bu AQSH kinosanoatidagi barcha ishlab chiqarishni amalda to‘xtatdi. Aktyorlar maoshlarni oshirish, qo‘shimcha ishlaganlik uchun kompensatsiya to‘lash va kinoda sunʼiy intellektdan foydalanishni cheklashni talab qilgan.
Eslatib o‘tamiz, ssenariy mualliflarining ish tashlashi Gollivud iqtisodiyotiga jiddiy zarar yetkazdi.
Financial Times nashrining yozishicha, Gollivud ssenariy mualliflari va aktyorlarining ish tashlashi sohaga 5 milliard dollardan (taxminan 4,7 milliard yevro) zarar yetkazgan.
