Ilhom Aliyev rafiqasi bilan Buxoroga jo‘nab ketdi
Oliy martabali mehmonni Oliy Majlis Qonunchilik palatasi Spikeri, Toshkent shahar hokimi va boshqa rasmiylar kuzatib qo‘ydi.
Shavkat Mirziyoyevning taklifiga binoan davlat tashrifi bilan O'zbekistonda bo‘lib turgan Ozarbayjon Prezidenti Ilhom Aliyev 24-avgust kuni Buxoro shahriga jo‘nab ketdi.
“Toshkent-Humo” xalqaro aeroportida oliy martabali mehmonni Oliy Majlis Qonunchilik palatasi Spikeri Nuriddin Ismoilov, Toshkent shahar hokimi Shavkat Umurzoqov va boshqa rasmiylar kuzatib qo‘ydi.
Tashrif dasturi doirasida 23-avgust kuni Toshkent shahrida O‘zbekiston va Ozarbayjon prezidentlari ishtirokida oliy darajadagi muzokaralar hamda Oliy davlatlararo kengashning uchinchi yig‘ilishi bo‘lib o‘tdi.
Unda ikki davlat o‘rtasidagi tovar ayirboshlash hajmini oshirish, hududlar va ishbilarmon doiralar o‘rtasidagi hamkorlikni kengaytirish, transport-tranzit imkoniyatlaridan samarali foydalanish hamda madaniy-gumanitar aloqalarni rivojlantirish masalalari muhokama qilindi.
Shuningdek, davlat rahbarlari xalqaro va mintaqaviy kun tartibidagi dolzarb masalalar yuzasidan fikr almashdilar.
Muzokaralar yakunida qator muhim hujjatlar imzolandi va iqtisodiy hamda boshqa yo‘nalishlarda muhim loyihalar ishga tushirildi.
