Shavkat Mirziyoyev Donald Trampga an’anaviy o‘zbek ayvonlarini sovg‘a qildi
Donald Tramp ularni Amerika xalqi nomidan qabul qilgan.
Shavkat Mirziyoyev AQSh Prezidenti Donald Trampga an’anaviy o‘zbek ayvonlarini sovg‘a qildi. Bu haqda The New York Times nashri xabar berdi.
AQSh Ichki ishlar vazirligi ma’lumotiga ko‘ra, O‘zbekistondan yuborilgan ayvonlar AQSh tomonidan qabul qilib olingan. Donald Tramp sovg‘ani Amerika xalqi nomidan qabul qilgan.
An’anaviy o‘zbek uslubida, nafis yog‘och o‘ymakorligi bilan bezatilgan ayvonlar O‘zbekiston va AQSh o‘rtasidagi do‘stona munosabatlarning ramzi sifatida bog‘ hududida qad rostlaydi. Ularni tashrif buyuruvchilar kuz oylarida tomosha qilishi kutilmoqda.
Ayvonlar AQShda tashkil etilishi rejalashtirilayotgan Amerika Qahramonlari Milliy bog‘i loyihasi doirasida G‘arbiy Potomak bog‘iga o‘rnatiladi. Mazkur loyihada taniqli amerikaliklarning taxminan 250 ta haykali, shuningdek, restoranlar, amfiteatr va boshqa obyektlar barpo etilishi ko‘zda tutilgan.
AQSh Ichki ishlar vazirligi vakili Keti Martinning ta’kidlashicha, an’anaviy o‘zbek pavilyonlari ikki mamlakat o‘rtasidagi mustahkam aloqalarning ramzi bo‘lib xizmat qiladi.
