Yevropa Ittifoqi bahorgacha yiliga 1 million snaryad ishlab chiqarishga erishmoqchi
Mahsulotning 40 foizi Yevropadan tashqariga eksport qilinadi.
Bryusselda Yevroparlament aʼzolariga Yevropa Ittifoqining Ukrainaga o‘q-dori yetkazib berish majburiyatlari mavzusiga oid sessiyasi bo‘lib o‘tdi. Unda Ichki bozor bo‘yicha Yevropa komissari Terri Breton Yevropa Ittifoqidagi mudofaa korxonalarining ishlab chiqarish salohiyati 2024-yil bahorigacha yiliga 1 million artilleriya snaryadiga yetkazishni reja qilayotganini maʼlum qildi.
Uning hisob-kitoblariga ko‘ra, kelgusi yil oxiriga borib bu ko‘rsatkich hatto 1,3-1,4 million snaryadni tashkil qilishi mumkin. Breton Yevropa Ittifoqining 15 davlatidagi harbiy-sanoat kompaniyalariga tashrif buyurganidan so‘ng shunday xulosaga kelganini taʼkidladi.
Yevropa komissarining qo‘shimcha qilishicha, "muammo shartnomalar bilan bog‘liq". Chunki mahsulotlarning qariyb 40 foizi Yevropadan tashqarida uchinchi mamlakatlarga yetkazib beriladi. Barcha ishlab chiqarilgan o‘q-dorilar Ukrainaga o‘tkazilishi uchun Yevropa Ittifoqi davlatlari maxsus ishlab chiqarishga ustuvor ahamiyat berishi kerak. Terri Bretonning taʼkidlashicha, bu aynan uning taklifi edi, afsuski, Yevropa Ittifoqi kengashi uni qo‘llab-quvvatlamadi.
Bundan tashqari, Yevropa Ittifoqi mamlakatlari hozirda snaryadlarni ishlab chiqarish bo‘yicha yetarli miqdorda shartnomalar tuzmayapti.
"Biz Yevropa mudofaa bozorini bosqichma-bosqich qurmoqdamiz. Shartnomalarning imzolanishi Ukrainaga yetkazib berishni tezlashtiradi", — deya taʼkidladi Breton.
Uning so‘zlariga ko‘ra, ishlab chiqarish tezlashmoqda. Yevropa Ittifoqi tezda qo‘shimcha quvvat yaratishi mumkin, biroq Ukrainaga yetkazib berish uchun birinchi navbatda siyosiy iroda kerak.
Yevropa Ittifoqi va unga aʼzo davlatlar allaqachon Ukrainaga umumiy qiymati 27 milliard yevrolik harbiy yordam ko‘rsatgan. Bu misli ko‘rilmagan miqdor. 2022-yil mart oyi oxirida Yevropa kengashi raisi Sharl Mishel shunday dedi:
"Bizning maqsadimiz Ukrainaga keyingi 12 oy ichida bir million snaryad yetkazib berishdir. Yevropa Ittifoqining ushbu qo‘shma tashabbusi haqiqiy Yevropa mudofaasi yo‘lidagi muhim yangi qadamdir".
Ukraina Qurolli kuchlarini o‘q-dorilar bilan taʼminlash uchun Yevropa Ittifoqi Yevropa tinchlik jamg‘armasidan 2 milliard yevro sarmoya kiritdi. Ukrainaga Yevropa Ittifoqi mamlakatlari zaxiralaridan kamida 300 ming dona o‘q-dorilar yetib kelgan. Bryussel mamlakatlar yangi qo‘shma xaridlar bo‘yicha shartnomalar tuzganini maʼlum qildi, ammo Yevrokomissiya ularning umumiy miqdori haqida maʼlumot bermagan.
