AQSH — Kanada chegarasida avtomobil portlab ketdi, qurbonlar bor
Voqea tafsilotlarini Federal tergov byurosi o‘rganmoqda.
Niagara sharsharasi yaqinida AQSH va Kanada o‘rtasidagi Kamalak ko‘prigida (Rainbow Bridge) avtomobil portlab ketdi. Bu haqda Federal tergov byurosi (FTB) xabar berdi. Hodisa oqibatida mashinada bo‘lgan ikki kishi halok bo‘ldi, deb taʼkidladi Amerikaning CNN va Fox News telekanallari politsiya xodimlariga tayanib. Bundan tashqari, Reuters agentligining xabar berishicha, AQSH chegara xizmatining bir xodimi yaralangan.
Huquq-tartibot idoralari hodisa tafsilotlarini maʼlum qilmagan. Hozirda tergov harakatlari boshlangan. FTB vaziyat "tez rivojlanayotganini" bildirdi.
Baʼzi OAV xabarlariga ko‘ra, AQSHdan Kanadaga ketayotgan avtomobil qarama-qarshi bo‘lakda katta tezlikda chegara o‘tish joyiga yaqinlashgan.
"Ikki davlat o‘rtasidagi to‘rtta chegara o‘tish punkti vaqtincha yopildi. Buffalo Niagara xalqaro aeroportida xavfsizlik choralari kuchaytirildi", — deya maʼlum qildi Nyu-York shtati gubernatori Keti Xokul.
Uning so‘zlariga ko‘ra, terakt belgilari yo‘q. Kamalak ko‘prigi yopiqligicha qolmoqda, ammo qolgan o‘tish joylari bo‘ylab harakat tiklandi.
AQSH prezidenti Jozef Bayden voqea haqida xabardor qilingan, deya xabar berdi Oq uy. Kanada bosh vaziri Jastin Tryudo vaziyatni «juda jiddiy» deb atadi.
