600 kgdan ortiq yaroqsiz go‘shtni olib ketayotgan shaxslar ushlandi
Ayni vaqtda tergov harakatlari o‘tkazilmoqda.
Huquqni muhofaza qiluvchi organ xodimlari tomonidan "Umakay" YPX maskanida o‘tkazilgan tezkor tadbirda Qarshi-Samarqand-Toshkent yo‘nalishi bo‘yicha harakatlanayotgan fuqaro F.E. boshqaruvidagi Cobalt avtomashinasi to‘xtatilib ko‘zdan kechirilganda, fuqaro B.X. jami 500 kg iste’molga yaroqsiz qoramol go‘shtini Toshkent shahrida o‘tkazish maqsadida olib ketayotganligi aniqlanib, ushbu mahsulotlar ashyoviy dalil sifatida olingan.
Yana bir holatda esa Samarqand-Toshkent yo‘nalishi bo‘yicha harakatlanib kelayotgan fuqaro E.M. boshqaruvidagi Isuzi yuk avtomashinasida fuqaro N.R. jami 165 kg iste’molga yaroqsiz qoramol go‘shtini Toshkent shahrida o‘tkazish maqsadida olib ketayotganligi aniqlanib, ushbu mahsulotlar ashyoviy dalil sifatida olingan.
Mazkur holatlar yuzasidan JKning 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishlari qo‘zg‘atilib, tergov harakatlari o‘tkazilmoqda.
