Senat raisi Parlamentlararo ittifoq bosh kotibi bilan muzokara o‘tkazdi
Unda Oliy Majlis Senati va Parlamentlararo ittifoq hamkorligining amaliy jihatlari muhokama qilindi.
Oliy Majlis Senati raisi Tanzila Narbayeva Dubay shahrida BMTning iqlim o‘zgarishi bo‘yicha konferensiyasi (SOR-28) doirasidagi parlament yig‘ilishida Parlamentlararo ittifoq bosh kotibi Martin Chungong bilan uchrashdi. Bu haqda Senat matbuot xizmati xabar berdi.
Parlamentlararo ittifoq Bosh kotibi O‘zbekistonning xalqaro maydonda ilgari surayotgan tashabbuslari nafaqat mintaqa, balki jahon hamjamiyati uchun ham muhim ekanini taʼkidlab o‘tdi.
O‘zbekiston dolzarb masalalarni hal etishda parlamentlarning hamjihatligini bir nuqtada birlashtiradigan maydonga aylanib borayotgani, o‘tgan yili Toshkentda PAIga aʼzo davlatlar parlamentlari ayol rahbarlarining 14-sammiti har tomonlama samarali bo‘lganiga eʼtibor qaratdi.
Parlamentlar Barqaror rivojlanish maqsadlarini amalga oshirish jarayonining ishtirokchilari hisoblanishini, joriy yilning 30 noyabr kuni Toshkentda o‘tgan Barqaror rivojlanish maqsadlarini amalga oshirishda parlamentlararo hamkorlik bo‘yicha II Global forum bu borada barcha davlatlar uchun hamkorlikni yo‘lga qo‘yish va o‘zaro tajriba almashishda muhim platforma bo‘lganini alohida qayd etdi.
Muloqot yakunida tomonlar hamkorlikdagi qo‘shma loyihalarni davom ettirishga kelishib oldilar.
