Surxondaryoda belgilanmagan joyga chiqindi tashlagan ayol jarimaga tortildi
Ayolning xatti-harakatlari kuzatuv kameralariga qayd etilgan.
Surxondaryo viloyati Sho‘rchi tumanida belgilanmagan joyga chiqindi tashlab ketgan ayolga chora ko‘rilgan. Bu haqda viloyat Ekologiya boshqarmasi axborot xizmati xabar berdi.
Surishtiruvlar natijasida belgilanmagan joyga chiqindi tashlagan huquqbuzarning shaxsi aniqlangan. So‘ng holat yuzasidan unga nisbatan MJtKning 91-Prim 1- moddasi 1-qismiga ko‘ra ma’muriy bayonnoma rasmiylashtirilgan.
Ayol bazaviy hisoblash miqdorining 1 barobari — 330 000 so‘m miqdorida jarimaga tortilgan.
Ma’lumot uchun: Termizdagi 10 ta hududda onlayn kuzatuv kameralari o‘rnatilgandi. Yaqinda esa yana 15 ta shunday kameralar olib kelingan. Bu kuzatuv kameralari nafaqat noqonuniy joyga chiqindi tashlash, balki boshqa turdagi ekologik huquqbuzarliklarni tezkorlik bilan aniqlab, o‘z vaqtida bartaraf etishga va tegishli choralarni ko‘rishga imkoniyat yaratadi.
