Xitoyda dahshatli zilzila: 100 dan oshiq qurbon bor
Mamlakatning Gansu provinsiyasida 6,2 magnitudali yer silkinishi kuzatildi.
Xitoyda 6,2 magnitudali zilzila yuz berdi. Oqibatda ko‘plab turar-joy binolari va infratuzilma vayron bo‘lgan. Qurbonlar soni kamida 111 kishini tashkil etmoqda.
Zilzila Gansu provinsiyasi, Linxia Xuyey avtonom prefekturasining Jishishan-Baoan-Dunsyan-Salar avtonom okrugida sodir bo‘lgan.
Xitoy seysmologik tarmoqlari markazi maʼlumotlariga ko‘ra, silkinishlar epitsentri shimoliy kenglik 35,7 daraja va sharqiy uzunlik 102,79 daraja koordinatali nuqtada, epitsentr 10 km chuqurlikda joylashgan.
Hozirgacha zilzila oqibatida 230 dan ortiq jarohat olgan va kamida 111 kishi halok bo‘lgani xabar qilingan.
Xitoy Xalq Respublikasi Davlat kengashi va Favqulodda vaziyatlar vazirligi huzuridagi Zilzilalar oqibatlarini bartaraf etish shtab-kvartirasi favqulodda vaziyatlarda favqulodda choralar ko‘rish darajasini ikkinchi darajaga ko‘tardi. Qidiruv-qutqaruv ishlari davom etmoqda.
