Telegramda yana virus tarqalmoqda

 

Telegramda "Iltimos, qizimga ovoz bering" mazmunida yana virus tarqalmoqda. Huquqshunos Xushnudbek Xudoyberdiyev bu bo‘yicha o‘z kanalida post joyladi.

 

Uning yozishicha, hech kimning qiziga ovoz berish kerak emas. Shunaqa xabarlarni ko‘rsangiz, havolaga kirib o‘tirmang. Hattoki eng yaqin insoningizdan kelgan bo‘lsa ham.

 

Afsuski, shu kabi xabarlar kanallarda ham chiqib ketmoqda (kanal egasining profili buzilgani uchun) va doimgidek guruhlarga tarqatilmoqda. Iltimos, Telegramdan kelgan duch kelgan havolaga kiravermang, qayta-qayta tekshiring.

 

Mabodo ehtiyotsizlik sababli profilingiz buzilgan taqdirda ham, zudlikda profilni tiklash, virusdan tozalash choralani ko‘ring. Buning uchun Telegramda “‎Sozlamalar” => “Qurilmalar” => «‎Boshqa barcha seanslarni tugatish» buyruqlarini bosishingiz kerak.

 

Shuningdek, albatta 2 bosqichli xavfsizlik tizimini ulang. Buning uchun “‎Sozlamalar” => «Maxfiylik va xavfsizlik» => «Ikki bosqichli tekshiruv» buyruqlari orqali o‘zingiz mustaqil parol qo‘yasiz.

 

Bu nima beradi? Masalan, sizning profilingizga kimdir kirmoqchi bo‘lsa, telegram orqali yuborilgan SMS-kodni kiritishdan tashqari, siz o‘ylab topgan parolni ham yozishi kerak bo‘ladi. Bu esa o‘z-o‘zidan xavfsizlikni kuchaytiradi. Faqat parolni siz ham esdan chiqarib qo‘ysangiz, uni tiklash uchun elektron pochta manzili kiritib qo‘yishni esdan chiqarmang.

 

Imkoni bo‘lsa parolni unutmaslik uchun biror yaqin insoningizning (o‘zingiznikini emas) pasport seriyasi va raqamini kiritib qo‘ying. Esdan chiqib ketsa ham, topish oson bo‘ladi.