Tokio aeroportiga qo‘nayotgan yo‘lovchi samolyot yonib ketdi
Samolyot bortida salkam 400 nafar yo‘lovchi bo‘lgan.
Tokiodagi “Haneda” aeroportida Japan Airlines aviakompaniyasi samolyoti yonib ketdi.
NHK telekanali eʼlon qilgan kadrlarda yo‘lovchilar samolyotdan damlama trapga sakrab, qanday qutulayotgani aks etganini ko‘rish mumkin.
Japan Airlines aviakompaniyasi xabariga ko‘ra, bortda bo‘lgan 379 yo‘lovchi va ekipajning o‘nga yaqin aʼzolarining barchasi evakuatsiya qilingan.
Kadrlarda layner butkul alanga ichida qolganini ko‘rish mumkin. Samolyot amalda to‘liq yonib ketgan.
Yong‘in sabablari maʼlum emas, ammo Reuters agentligi va NHK xabariga ko‘ra, Japan Airlines reysi aeroportga qo‘nish chog‘ida Yaponiya sohil qo‘riqlash xizmati samolyotiga urilib ketgan bo‘lishi mumkin.
Yaponiya Yer, infratuzilmalar, transport va turizm vazirligi tekshiruv o‘tkazilayotgani haqida xabar bergan.
Yonib ketgan samolyot — Airbus A350 2021 yilda ishlab chiqarilgan. Bu Hokkaydo orolidagi “Sin-Titose” aeroportidan uchib kelgan JAL516 reysi bo‘lgan.
