AQSH davlat kotibi yana Yaqin Sharqqa boradi
Entoni Blinken G‘azo sektorida urush boshlanganidan beri to‘rtinchi marta Yaqin Sharq mamlakatlariga tashrif buyuradi.
AQSH davlat kotibi Entoni Blinken yaqin kunlarda Yaqin Sharq bo‘ylab navbatdagi turnega boradi. Bu haqda Davlat departamenti matbuot kotibi Metyu Miller jurnalistlarga maʼlum qildi.
Uning taʼkidlashicha, bu oldindan rejalashtirilganidan uzoqroq safar. Davlat kotibi Isroil, Iordan daryosi G‘arbiy sohili, Iordaniya, Qatar, Birlashgan Arab Amirliklari, Saudiya Arabistoni va Misrga tashrif buyuradi. Blinken Yaqin Sharq davlatlaridan tashqari Turkiya va Gretsiyaga ham boradi.
Millerning qo‘shimcha qilishicha, yaqin kunlardagi muzokaralar G‘azo sektoriga ko‘proq gumanitar yordam yetkazish, HAMASdan qolgan garovga olinganlarni ozod qilish va Isroil — Falastin mojarosida tinch aholi himoyasini yaxshilash saʼy-harakatlariga qaratiladi.
"Blinken o‘z safari davomida mintaqa davlatlari mojaroning G‘azo sektoridan tashqarida avj olishiga yo‘l qo‘ymaslik uchun qanday taʼsir ko‘rsatishi mumkinligi borasida aniq qadamlarni muhokama qilmoqchi. Mojaroning kengayishi hech kim uchun foydali emas — na Isroil, na butun Yaqin Sharq mintaqasi, na butun dunyo uchun", — dedi Miller.
Uning so‘zlariga ko‘ra, safar davomidagi muzokaralar oson kechmaydi.
Eslatib o‘tamiz, Blinken oktabr oyida G‘azo urushi boshlanganidan beri Yaqin Sharq bo‘ylab uch marta safar qilgan.
