Pentagon rahbari yangi yildan beri kasalxonada. U saraton bilan kurashmoqda
Bayden salkam 10 kun avval kasalxonaga yotqizilgan 70 yoshli Lloyd Ostinning kasallik tashxisi haqida kecha, 9-yanvar kuni ertalab bilgan. U o‘z vazirining saratonga chalingani fakti yashirilganini eshitib, "g‘azab otiga mindi".
Oq uy rasmiylariga ko‘ra, AQSH prezidenti Jo Bayden salkam 10 kun avval kasalxonaga yotqizilgan 70 yoshli Lloyd Ostinning kasallik tashxisi haqida kecha, 9-yanvar kuni ertalab bilgan. U o‘z vazirining saratonga chalingani fakti yashirilganini eshitib, "g‘azab otiga mindi".
"Bugun ertalabgacha Oq uyda hech kim vazir Ostinda saraton borligini bilmas edi", — dedi Milliy xavfsizlik kengashining aloqa bo‘yicha direktori Jon Kirbi.
Bu shuni anglatadiki, Bayden Ostin kasalligi haqida jamoatchilikdan bir necha soat oldin xabar topgan.
Oq uy vakilining bildirishicha, Bayden o‘z vazirining saratonga chalingani fakti yashirilgani haqidagi xabarga g‘azab bilan munosabatda bo‘lgan.
"Bunday bo‘lmasligi kerak. Bu voqea boshqa takrorlanmasligiga ishonch hosil qilishimiz lozim. Vazirlar mahkamasining har bir aʼzosi bu lavozim imkon qadar shaffof bo‘lish masʼuliyatini yuklashini biladi", — deya AQSH prezidentining so‘zlarini keltirgan Jon Kirbi.
Unga ko‘ra, Bayden hukumatda bunday holatlar bo‘yicha tartib qayta ko‘rib chiqilishini istayapti. Vazirliklarga tegishli xat allaqachon yuborilgan.
Prezident Mudofaa vaziriga tezroq tuzalib ketishini tilaydi, dedi Kirbi. Bayden Ostin bilan 2025 yil boshida tugaydigan vakolat muddatining oxirigacha qolishni rejalashtiryaptimi, degan savolga, Kirbi: “Ha” deb javob berdi.
Pentagon Ostinning sog‘ligi haqida maʼlumot berdi
Avvalroq Pentagon AQSH mudofaa vaziri Lloyd Ostin saraton tufayli kasalxonada davolanayotganini maʼlum qilib, vazirning kasalligi dastlabki bosqichda aniqlangani va uning tuzalib ketish istiqbollari "aʼlo darajada" ekanini maʼlum qilgandi. Maʼlum bo‘lishicha, Ostin yangi yildan beri kasalxonada.
Bundan tashqari, Vashington yaqinidagi Uolter Rid harbiy gospitalining vakolatxonasi xabarida aytilishicha, Pentagon rahbariga dekabr oyi boshida saraton tashxisi qo‘yilgan. Rojdestvo arafasida Ostin minimal invaziv jarrohlik amaliyotini o‘tkazdi. Vazir "operatsiyadan hech qanday muammosiz tiklanib, ertasi kuni ertalab uyiga qaytdi", deyiladi xabarda.
Ammo yangi yil kuni vazir kasallik asoratlari tufayli yana kasalxonaga yotqizildi. Dastlabki tekshiruvda peshob yo‘llari infeksiyasi aniqlangan va 2 yanvar kuni u jonlantirish bo‘limiga o‘tkazilgan. Shundan so‘ng, shifokorlarning taʼkidlashicha, Ostin tuzalib ketdi va uning "to‘liq tiklanishi" kutilmoqda, ammo bu jarayon uzoq davom etishi mumkin. "Vazir Ostin kasalxonada bo‘lgan paytida hushini yo‘qotmadi yoki umumiy behushlikda bo‘lmadi", deya maʼlumot bergan kasalxonada.
Respublikachilar: Ostinni isteʼfoga chiqishi kerak
Ostinning kasalligi bilan bog‘liq bir necha kunlik noaniqlik muxolifatdagi respublikachilar keskin tanqidiga sabab bo‘ldi. Bir qator siyosatchilar mudofaa vaziri isteʼfosini talab qilmoqda. Ular Rossiyaning Ukrainadagi urushi va Yaqin Sharqdagi keskin vaziyat holatida idora boshlig‘ining yo‘qligida Pentagonni kim boshqarayotganini tushunmayapti.
Qo‘shma Shtatlarda jamoatchilik yuqori lavozimli siyosatchilarning sog‘lig‘i haqida to‘liq maʼlumot olishi odat tusiga kirgan.
Lloyd Ostin 2021 yilda vakolat muddati boshlanganidan beri Bayden jamoasi aʼzosi. U Pentagonga rahbarlik qilayotgan birinchi afroamerikalik bo‘ldi. 2016 yilgacha AQSHning amaldagi mudofaa vaziri Yaqin Sharqda joylashgan AQSH kuchlari qo‘mondoni bo‘lgan. Bu lavozimda u AQSHning Iroq, Suriya va Afg‘onistondagi missiyalari uchun masʼul edi. AQSH armiyasidagi 40 yildan ortiq faoliyatining boshida Ostin Germaniyada xizmat qilgan.
