"Makarov" pistoletini 10 ming dollarga sotmoqchi bo‘lgan shaxs ushlandi
Holat Samarqand viloyatida yuz bergan.
Davlat xavfsizlik xizmatining Samarqand viloyati bo‘yicha boshqarmasi xodimlari tomonidan Jomboy tumanida o‘tkazilgan tezkor tadbirda Toshkent shahrida yashovchi, 1977 yilda tug‘ilgan shaxs xaridorga 1 dona "Makarov" pistoleti va uning 96 dona o‘q-dorisini 10 ming AQSH dollariga sotmoqchi bo‘lgan vaqtida ashyoviy dalillar bilan qo‘lga olindi.
Shuningdek, uning yashash xonadonida o‘tkazilgan tintuv harakatlari davomida foydalanishga yaroqli deb topilgan, kalibri 5,6 mm bo‘lgan eski rusumdagi "Monte Kristo" to‘pponchasi, turli xil gilzalar, ov miltig‘i qismlari, o‘tkir tig‘li jismlar hamda boshqa ashyoviy dalillar prosessual tartibda rasmiylashtirib olindi.
Hozirda mazkur shaxsga nisbatan JKning 248-moddasi 3-qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
