Sovuqda allergiyadan qanday himoyalanish kerak?
Bu bo‘yicha mutaxassis javob berdi.
Havo harorati keskin pasayganda baʼzi bemorlarda sovuqdan allergiya kuzatilishi mumkin. Bu terida qizarish, shish, pufakchalar, qichishish, ko‘z yoshlanishi kabi alomatlar bilan namoyon bo‘ladi.
Xastalikning aynan past harorat taʼsirida yuzaga kelayotganini uy sharoitida ham sinab ko‘rish mumkin. Buning uchun qo‘lingizning bilak qismiga muz bo‘lakchasini qo‘yib, 5-10 daqiqa ushlab turasiz.
Agar shu vaqt davomida bilagingizda qavarchiq paydo bo‘lsa, qichishish, qizarish yoki achishishni sezsangiz, demak, sizda sovuqdan allergiyaga moyillik bo‘lishi mumkin. Ammo aniq va yakuniy tashxisni allergolog-immunolog qo‘yadi.
Shifokor ko‘rsatmasiga ko‘ra, maxsus sinamalar topshiriladi. Qon tahlili orqali bemorda eozinofillar va immunoglobulin E miqdori qisman oshishi tasdiqlansa, tegishli davo muolajalari belgilanadi.
Shunga qarmay, bu turdagi allergiyaga moyilligi bor kishilar sovuqdan himoyalanishlari kerak.
Avvalo, sovuq kunlarda qalin kiyining! Qo‘lqop, bosh kiyimi, sharf va issiq paypoqlardan foydalaning!
Izg‘irin haroratda ko‘chaga chiqishdan avval shifokor tavsiya etgan himoya kremlari va maxsus malhamlarni qo‘llang!
Sovuq ichimlik va yeguliklar isteʼmol qilmang!
Sovuq suvda cho‘milmang! Yuvinish chog‘ida qattiq mochalkalardan foydalanmang!
Immunitetni mustahkamlovchi mahsulotlar, darmondorilar, temir, kalsiy, sink, kaliy, selenga boy taomlar tanovul qiling!
Asal, murabbo, spirtli ichimliklar, achchiq, sho‘r yeguliklar, qizil rangli mevalar, bo‘yoq qo‘shilgan mahsulotlar, baliq va ot go‘shtidan tayyorlangan taomlar, yong‘oq, yeryong‘oq, pista kabi quruq mevalar, turli o‘tlardan damlamalar isteʼmol qilmay turganingiz maʼqul. Chunki ularda allergik xastalik qo‘zg‘atuvchi xususiyatlar mavjud.
Shuningdek, allergiyaga moyil kishilar shifokor tavsiyasisiz sulfanilamidlar, antibiotiklar, talvasa (sudorogi), yallig‘lanish va silga qarshi preparatlar hamda turli vitaminlar qabul qilishi mumkin emas.
Hozirgi kunda Respublika ixtisoslashtirilgan allergologiya va klinik immunologiya ilmiy-amaliy tibbiyot markazimizda ushbu kasallikka aniq tashxis qo‘yish barobarida, uni samarali davolash yo‘lga qo‘yilgan.
